لەگيونەر سپورتشىلارعا قاتىستى ليميت زاڭمەن بەكىتىلەدى - مينيسترلىك
استانا. KAZINFORM - تۋريزم جانە سپورت مينيسترلىگى «دەنە شىنىقتىرۋ جانە سپورت» سالاسىنداعى زاڭعا وزگەرىستەر مەن تولىقتىرۋلار ەنگىزۋ بويىنشا زاڭ جوباسىن ازىرلەدى. زاڭ جوباسىنداعى وزگەرىستەردىڭ ءبىرى لەگيونەر سپورتشىلارعا قاتىستى ليميتتى زاڭمەن بەكىتۋ نورماسى ەنگىزىلمەك.

ءماجىلىس دەپۋتاتى نارتاي سارسەنعالييەۆ الەۋمەتتىك جەلىدەگى جەكە پاراقشاسىندا ەندىگى ۋاقىتتا لەگيونەر سپورتشىلارعا 1 تيىن بەرىلمەيتىنى تۋرالى مالىمدەمە جاسادى.
«ادام ەستىمەگەن سپورت تۇرلەرىنە اقشا بەرىپ كەلگەن مينيسترلىكتىڭ شەشىمى دە توقتاتىلدى. 180 سپورت ءتۇرى قىسقارتىلادى. ءتيىستى نورمانى ۇكىمەت قولدادى»، - دەپ جازدى نارتاي سارسەنعاليەۆ جەلىدەگى پاراقشاسىندا.
حالىق قالاۋلىسىنىڭ مالىمەتىنشە، قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي-اق نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ 49-بابىنىڭ ءبىرىنشى بولىگىنە سايكەس «قازاقستان رەسپۋبليكاسىنىڭ ازاماتتارى بولىپ تابىلمايتىن سپورتشىلاردى بيۋدجەت قاراجاتى ەسەبىنەن قارجىلاندىرۋدى جۇزەگە اسىرۋعا تىيىم سالىنادى. سونداي- اق، نارتاي سارسەنعاليەۆ قازاقستان رەسپۋبليكاسىنىڭ ازاماتتارى بولىپ تابىلمايتىن سپورتشىلاردى كۆازيمەملەكەتتىك سەكتور سۋبەكتىلەرىنىڭ قاراجاتى ەسەبىنەن قارجىلاندىرۋعا جول بەرىلمەيتىنىن ايتىپ وتىر.
وسى ورايدا دەنە شىنىقتىرۋ جانە سپورت زاڭىنداعى وزگەرىستەر مەن تولىقتىرۋلارعا قاتىستى تۋريزم جانە سپورت مينيسترلىگىنە ساۋال جولداعان ەدىك.
«مەملەكەت باسشىسىنىڭ قازاقستان حالقىنا جولداۋى مەن 2024-جىلعى 27-تامىزدا وليمپيادا جۇلدەگەرلەرىمەن كەزدەسۋ كەزىندە بەرگەن تاپسىرمالارىنا سايكەس، قازىرگى تاڭدا، «دەنە شىنىقتىرۋ جانە سپورت» سالاسىنداعى زاڭعا وزگەرىستەرمەن تولىقتىرۋلار ەنگىزۋ بويىنشا زاڭ جوباسى ازىرلەندى. زاڭ جوباسىندا قاراستىرۋدا وزگەرىستەردىڭ ءبىرى رەتىندە لەگيونەر سپورتشىلارعا قاتىستى ءليميتتى زاڭمەن بەكىتۋ نورماسى ەنگىزىلگەن. كاسىبي كوماندالىق سپورت كلۋبتارىنا ارنالعان قارجىلاندىرۋ ليميتتەرىن بەكىتۋ جانە سپورتتىڭ باسىم تۇرلەرىن ايقىنداۋ قۇزىرەتى سپورت سالاسىنداعى ۋاكىلەتتى ورگانعا بەرىلەدى. بۇل رەتتە، سپورت سالاسىندا تىكەلەي بىرىكتىرىلگەن باسقارۋ جۇيەسىن ەنگىزۋ كوزدەلۋدە»، - دەلىنگەن اگەنتتىك جولداعان رەسمي ساۋال جاۋابىندا.
قازىر اتالعان زاڭ جوباسى ءماجىلىستىڭ قاراۋىندا.
«زاڭعا ەنگىزىلگەن تاعى ءبىر وزگەرىس مەملەكەتتىك بيۋجەتتەن قارجىلاندىرىلاتىن سپورت تۇرلەرى ءۇش ساناتقا بولىنەدى، ول نەگىزگى»، مەدالدىق جانە ۇلتتىق سپورت. قازىرگى تاڭداعى 180 سپورت تۇرىنەن وليمپيادالىق جانە ۇلتتىق سپورت تۇرلەرىن جانە ازيا ويىندارىنىڭ باعدارلاماسىنا كىرەتىن سپورت تۇرلەرىن قالدىرۋ جوسپارلانىپ وتىر. لەگيونەر سپورتشىلارعا قاتىستى كاسىبي كوماندالىق سپورت كلۋبتارىنا ارنالعان قارجىلاندىرۋ ليميتتەرىن بەكىتۋ جانە سپورتتىڭ باسىم تۇرلەرىن ايقىنداۋ قۇزىرەتى سپورت سالاسىنداعى ۋاكىلەتتى ورگانعا بەرىلۋى قاراستىرىلعان»، - دەگەن جاۋاپ الدىق مينيسترلىكتەن.