ليونەل مەسسي يسپانيانىڭ تاعى ءبىر كلۋبىن ساتىپ الدى

كلۋبتىڭ باسپا ءسوز قىزمەتىنىڭ مالىمەتىنشە، مامىلە يسپانيانىڭ ورتالىق سپورت دەپارتامەنتىنىڭ كەلىسىمىن كۇتىپ تۇر، دەپ حابارلايدى Egemen.kz.

1921-جىلى قۇرىلعان «ەلدەنسە» كلۋبى اليكانتە پروۆينتسياسىندا ورنالاسقان. كوماندا قازىرگى تاڭدا سەگۋندا چەمپيوناتىندا وينايدى. جەتى تۋردان كەيىن كلۋب بەس ۇپاي جيناپ، تۋرنير كەستەسىندە 19-ورىندا تۇر.

بۇعان دەيىن قىركۇيەكتە Marca باسىلىمى مەسسيدىڭ «ەلدەنسە» كلۋبىن ساتىپ الۋ تۋرالى كەلىسىمگە كەلگەنىن جازعان. جوبا ارگەنتينالىق فۋتبولشىنىڭ فۋتبولعا ينۆەستيتسيا سالۋ جوسپارىمەن بايلانىستى ەكەنىن حابارلانعان. باسىلىمنىڭ مالىمەتىنشە، مەسسي كاسىبي مانسابىن اياقتاعاننان كەيىن كاتالونيادا تۇرۋدى جوسپارلاپ وتىر.

كلۋب جاڭا يەسىنىڭ اۋىسۋىنا قاراماستان ءوزىنىڭ تاريحى مەن ءداستۇرىن، سونداي- اق كوك-قىزىل تۇستەرىن ساقتاپ، كاسىبي فۋتبولداعى پوزيتسياسىن نىعايتۋدى كوزدەيدى.

«ەلدەنسە» مەسسيدىڭ 2026-جىلى ساتىپ العان يسپانياداعى ەكىنشى كلۋبى بولىپ وتىر. ءساۋىر ايىندا فۋتبولشى كاتالونيادا ورنالاسقان «كورنەليا» كلۋبىنىڭ دا يەسى اتانعان ەدى.

ەسكە سالايىق بۇعان دەيىن مەسسي ارگەنتينا قۇراماسىنداعى مانسابىن اياقتايتىنىن مالىمدەدى. ونىڭ ۇلتتىق قۇراما ساپىنداعى سوڭعى ويىنى 6-قازاندا بۋەنوس-ايرەستە بەنينگە قارسى وتەدى.