ۇلىتاۋ وبلىسىندا اسا ءىرى مولشەردەگى بيۋدجەت قاراجاتىن تالان- تاراجعا سالعاندار انىقتالدى

پروكۋرورلار جەزقازعان قالاسىنىڭ تۇرعىن ءۇي كوممۋنالدىق شارۋاشىلىعى، جولاۋشىلار كولىگى جانە اۆتوكولىك جولدارى ءبولىمىنىڭ قىزمەتىن تەكسەردى، دەپ حابارلايدى Kazinform باس پروكۋراتۋراعا سىلتەمە جاساپ.

تەكسەرۋ ناتيجەسى بويىنشا جەزقازعان قالاسىنىڭ جىلۋ جەلىلەرىن قايتا قۇرۋ جانە جاڭعىرتۋ كەزىندە بيۋدجەت قاراجاتىن اسا ءىرى مولشەردە تالان-تاراجعا سالۋ فاكتىسى انىقتالدى.

اتاپ ايتقاندا، 2021 -جىلى ت ك ش ءبولىمىنىڭ لاۋازىمدى تۇلعالارى قۇرىلىس جۇمىستارىن جوعارى باعامەن قابىلداعان، بۇل 223 ميلليون تەڭگەدەن استام مولشەردە بيۋدجەت قاراجاتىن نەگىزسىز ارتىق تولەۋگە اكەلگەن.

اتالعان فاكت بويىنشا وبلىس پروكۋراتۋراسى قىلمىستىق كودەكستىڭ 189-بابى (سەنىپ تاپسىرىلعان بوتەن مۇلىكتى يەمدەنىپ الۋ نەمەسە تالان- تاراجعا سالۋ) بويىنشا سوتقا دەيىنگى ءىس جۇرگىزۋدى باستاپ، ونى تەرگەپ-تەكسەرۋ ۇلىتاۋ وبلىسى بويىنشا سىبايلاس جەمقورلىققا قارسى ءىس-قيمىل اگەنتتىگىنىڭ دەپارتامەنتىنە تاپسىرىلدى.

قىلمىستىق ءىستى تەرگەپ-تەكسەرۋ بارىسى وبلىس پروكۋراتۋراسىنىڭ باقىلاۋىنا الىندى.

قىلمىستىق-پروتسەستىك كودەكستىڭ 201-بابىنا سايكەس وزگە مالىمەت تەرگەۋ مۇددەسىندە جاريا ەتۋگە جاتپايدى.

سونىمەن قاتار قازاقستان رەسپۋبليكاسى كونستيتۋتسياسىنىڭ 77-بابىنا جانە قىلمىستىق-پروتسەستىك كودەكستىڭ 19-بابىنا سايكەس اركىم ءوزىنىڭ قىلمىستىق قۇقىق بۇزىشىلىق جاساۋداعى كىنالىلىگى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن كىناسىز بولىپ سانالادى.