ەلىمىزدىڭ تۋريستىك الەۋەتىن تانىتاتىن جارنامالىق ناۋقانعا قانشا قارجى ءبولىندى
استانا. KAZINFORM - تۋريزم جانە سپورت مينيسترلىگى ەلىمىزدىڭ تۋريستىك الەۋەتىن شەتەلدىكتەرگە تانىتاتىن جارنامالىق ناۋقانعا بيىل قانشا قاراجات بولىنگەنىن اتادى.
«جىلدا ۇيىمداستىرىلاتىن ءتۋريزمدى وفلاين ىلگەرىلەتۋ ماقساتىندا حالىقارالىق تۋريستىك كورمەلەر، نارىق قاتىسۋشىلارىنىڭ وكىلدەرى اراسىندا B2B كەزدەسۋلەر ۇيىمداستىرىلادى. سونداي- اق اۋە كومپانيالارمەن، حالىقارالىق تۋريستىك قاۋىمداستىقتارمەن جانە جەرگىلىكتى اتقارۋشى ورگاندارمەن ارىپتەستىكتە قازاقستاننىڭ تۋريستىك الەۋەتىمەن تانىستىرۋ ءۇشىن اقپاراتتىق جانە باسپا ءسوز تۋرلارى وتكىزىلەدى»، - دەپ اتاپ ءوتتى مينيسترلىكتەن اگەنتتىكتىڭ رەسمي ساۋالىنا وراي.
ۆەدومستۆونىڭ اتاپ وتۋىنشە، قازاقستاننىڭ تۋريستىك الەۋەتىن ىلگەرىلەتۋ ماقساتىندا ءىرى مەديا الاڭدار مەن الەۋمەتتىك جەلىلەردە ءتۇرلى جارنامالىق ناۋقاندار وتكىزىلىپ ءجۇر.
«Kazakh Tourism» ۇلتتىق كومپانياسى اكتسيونەرلىك قوعامىنىڭ حالىقارالىق جانە ىشكى نارىقتاردا ءتۋريزمدى ىلگەرىلەتۋگە ارنالعان بيۋدجەتى 2022 -جىلى - 520905 مىڭ، 2023 -جىلى - 565488 مىڭ جانە 2024 -جىلى 400049 مىڭ تەڭگەنى قۇرادى. جۇرگىزىلىپ جاتقان جۇمىس تۋريستىك اعىننىڭ ارتۋىنا ۇلكەن ۇلەس قوسىپ وتىر. 2023 -جىلى ەلگە 9,2 ميلليون شەتەلدىك ازامات كەلدى. بۇل 2022 -جىلعى كورسەتكىشتەن 2 ەسە (4,7 ميلليون ادام) كوپ. ماركەتينگتىك ناۋقاندار بەلسەندى جۇرگىزىلگەن ەلدەردىڭ تۋريستەرى اراسىندا ايتارلىقتاي ءوسىم بايقالادى»، - دەدى مينيسترلىكتەن.
