ەلىمىزدىڭ قاي وڭىرىندە اتاۋلى الەۋمەتتىك كومەك الاتىندار كوپ

استانا. KAZINFORM - بيىل 11 ايدا ەلىمىزدە 36,2 ميلليارد تەڭگە سوماسىنا 77,6 مىڭ وتباسىنداعى 411,3 مىڭ ادام اتاۋلى الەۋمەتتىك كومەك الدى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس انافين ايتتى.

— وڭىرلەر بولىنىسىندە ا ا ك الۋشىلاردىڭ كوبى تۇركىستان وبلىسىندا — 20,3 پايىز، شىمكەنت قالاسىندا — 11,3 پايىز، قىزىلوردا وبلىسىندا — 8,2 پايىز، الماتى وبلىسىندا — 7,9 پايىز، جامبىل وبلىسىندا — 7,5 پايىز جانە جەتىسۋ وبلىسىندا — 7 پايىز بايقالادى. بۇل وڭىرلەرگە جالپى الۋشىلار سانىنىڭ 62,2 پايىزى تيەسىلى، — دەدى ۆيتسە-مينيستر.

ونىڭ دەرەگىنشە، ااك الۋشىلاردىڭ 55 پايىزى قالالىق جەرلەردە، ال 45 پايىزى اۋىلدىق جەرلەردە تۇرادى.

— الەۋمەتتىك مارتەبەلەر بولىنىسىندە ااك الۋشىلار اراسىندا كوبى بالالار — 273,9 مىڭ ادام نەمەسە 66,6 پايىز. سونداي- اق الۋشىلار قاتارىندا ءوتىنىش بەرگەن ساتتە جۇمىسى بار ادامدار — 14,3 پايىز، بالالارعا، مۇگەدەكتىگى بار ادامدارعا، قارتتارعا كۇتىم جاسايتىن ادامدار — 12,2 پايىز، مۇگەدەكتىگى بار تۇلعالار — 0,6 پايىز، زەينەتكەرلەر — 0,2 پايىز ستۋدەنتتەر — 3,9 پايىز، جۇمىسسىزدار — 1,4 پايىز جانە باسقا ساناتتاعى ادامدار — 0,8 پايىز، — دەدى ولجاس انافين.

بۇعان دەيىن ا ا ك- كە ءوتىنىش بەرگەن ازامات كىرىستەرى مەن شىعىستارىن تەكسەرۋگە كەلىسىم بەرەتىندىگىن جازعان ەدىك.