ەلىمىزدەگى شيپاجايلار حالىققا قولجەتىمدى مە؟

استانا. قازاقپارات - ەلىمىزدە 180 گە جۋىق شيپاجاي بار. ونىڭ 42 ءسى مەملەكەتكە تيەسىلى. كۋرورت ۇيىمداردىڭ سانى بويىنشا تۇركىستان وبلىسى كوش باستاپ تۇر.

Massaget.kz ءتىلشىسى ەلىمىزدەگى شيپاجايلارعا شولۋ جاسادى.

ۇلتتىق ستاتيستيكا بيۋروسىنىڭ مالىمەتىنشە، ەل اۋماعىندا 172 ساناتورلى-كۋرورتتىق ۇيىم بار، ونىڭ ىشىندە 109 ساناتوري، 27 وڭالتۋ ورتالىعى، 9 پروفيلاكتوري، 7 مامانداندىرىلعان جانە باسقا دا ساناتوريلەر.

ساۋىقتىرۋ ۇيىمدارىنىڭ باسىم بولىگى جەكە بيزنەسكە تيەسىلى – 127، مەملەكەتكە – 42، شەتەلدىك مەنشىكتە - 3.

بۋرابايداعى «وقجەتپەس» شيپاجايى

«وقجەتپەس» ەمدەۋ-ساۋىقتىرۋ كەشەنىندە ەڭ ارزان بولمە - 55 تەڭگە. ال ەڭ قىمباتى - 140 مىڭ تەڭگە. مۇندا 6 ادامعا ارنالعان VIP ءۇيدىڭ قۇنى - 280 مىڭ تەڭگە.

مۇندا ارنايى ەمدىك دەنە شىنىقتىرۋ، ارنايى تۇز شاحتاسى مەن جولداما قۇنىنا كىرەتىن مەديتسينالىق قىزمەتتەر كورسەتىلەدى:

دارىگەرلەر كەڭەسى؛

اپپارات-فيزيكالىق تەراپيا؛

وزوكەريت باستىرمالارى؛

«مايبالىق» مينەرالدى سۋىمەن قىزىل يەكتى ستوماتولوگيالىق سۋلاۋ؛

سۋمەن ەمدەۋ؛

بالنەولوگيالىق ەمدەۋ؛

شوپپەن ەمدەۋ؛

قىمىزبەن ەمدەۋ جانە تاعى باسقالارى.

«سارىاعاش» شيپاجايى

ەگەر بۋرابايدا ەم الۋ قىمبات دەسەڭىز، سىزگە «سارىاعاش اراسانى» ەمدەۋ-ساۋىقتىرۋ كەشەنىن ۇسىنامىز. مۇندا دەمالۋ ءبىر تاۋلىككە 10 مىڭ تەڭگەدەن باستالادى. ستاندارت بولمەلەر 16 مىڭ تەڭگەدەن، ال 2 بولمەلىك VIP ليۋكستىڭ قۇنى - 22 مىڭ تەڭگە.

مۇندا بالنەوتەراپيا، گيدروتەراپيا مەن فيزيوتەراپيا الۋ مۇمكىندىگى بار.

الاكولدەگى «بارلىق» شيپاجايى

الاكولدەگى «بارلىق» شيپاجايى تەك جاز ماۋسىمىندا عانا جۇمىس ىستەيدى. ماۋسىمدا 2 ادامعا ارنالعان بولمەنىڭ قۇنى 11 مىڭ تەڭگە بولسا، 1 ادامعا ارنالعان بولمە 12 مىڭ تەڭگە بولادى. ال شىلدەدە باعا وسەدى: 2 ادامعا ارنالعان بولمە 12500 تەڭگە، 1 ادامعا ارنالعان بولمە 13 مىڭ تەڭگە تۇرادى.

بۇل باعاعا 4 مەزگىل تاماقتانۋ مەن ەمدىك ۆاننا كىرەدى. سونداي-اق قوسىمشا قاراجاتقا باسقا دا ەمدەۋ شارالارىن الۋعا بولادى.

«سوسنوۆىي بور» شيپاجايى

«سوسنوۆىي بور» شيپاجايىنىڭ ءبىر ەرەكشەلىگى - قاراعاي ورمانى. شيپاجايدا ارنايى جولدامالار باعاسى ماۋسىمعا قاتىستى وزگەرىپ وتىرادى. ماسەلەن، قاڭتار-مامىر، قىركۇيەك-جەلتوقسان ارالىعىندا جولداما قۇنى 45 مىڭ تەڭگە، ال جازدا 51 مىڭ تەڭگە. بۇل - جارتىلاي ليۋكس بولمەنىڭ ءبىر تاۋلىككە ارنالعان قۇنى. ال ەڭ ارزان باعا - 7200 تەڭگە. بۇل - ەكى بولمەلى ءتورت ادامدىق بولمەنىڭ قۇنى.

مۇندا سۋمەن، بالشىقپەن، فيزيو، وزوكەريتو-پارافينمەن ەمدەۋ شارالارى، سونداي-اق ينگالياتسيا ارقىلى ەمدەۋ پروتسەدۋرالارى بار.

ەسكە سالايىق، بۇعان دەيىن شيپاجايعا تەگىن جولدامانى كىمدەر الا الاتىنى تۋرالى ماقالا جاريالاعان ەدىك.

ارداگەرلەر؛

ساياسي قۋعىن-سۇرگىندەر قۇرباندارى؛

جاسىنا بايلانىستى زەينەتكە شىققان زەينەتكەرلەر؛

ءبىرىنشى توپتاعى مۇگەدەكتىگى بار ادامدار.