ەلىمىزدەگى شەتەل ۋنيۆەرسيتەتتەرىندە كونستيتۋتسيا قازاق تىلىندە وقىتىلادى - ساياسات نۇربەك
استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ەلىمىزدە اشىلىپ جاتقان شەتەل جوعارى وقۋ ورىندارىنىڭ فيليالىندا قازاق ءتىلى مەن قازاقستان تاريحىنان بولەك، كونستيتۋتسيا جانە قۇقىق نەگىزدەرى قازاق تىلىندە وتەتىنىن ءمالىم ەتتى.
«مەملەكەتتىك ستاندارتقا سايكەس، ەلىمىزدە اشىلعان كەز كەلگەن شەتەلدىك جوعارى وقۋ ورنىنىڭ فيليالىندا قازاق ءتىلى، قازاقستان تاريحى پاندەرى بولادى. بۇل - مەملەكەتتىك ستاندارتتىڭ تالابى. جالپى وقۋ مازمۇنى شەت تىلىندە، ەڭ مىقتى ستاندارتتارمەن وقىتىلادى، ءبىراق ءتىل، تاريح، كونستيتۋتسيا، قۇقىق نەگىزدەرى مىندەتتى تۇردە قازاق تىلىندە ساقتالادى»، - دەدى ساياسات نۇربەك اگەنتتىك ءتىلشىسىنىڭ ساۋالىنا جاۋاپ بەرە تۇرىپ.
ءمينيستردىڭ مالىمدەۋىنشە، قازىر ەلىمىزدە اشىلعان شەتەل جوعارى وقۋ ورىندارى فيليالىندا اتالعان ستاندارتتار ورىندالىپ جاتىر.
«ءبىز ونى تالاپ ەتەمىز، ول جاعىنان ەشقانداي كەدەرگى جوق، ءبىزدىڭ شەتەلدىك سەرىكتەستەرىمىز وعان قوسىلادى، ەشقانداي قارسىلىق جوق»، - دەپ تولىقتىردى ۆەدومستۆو باسشىسى.
ەسكە سالا كەتسەك، بۇعان دەيىن ەلىمىزدە اشىلعان شەتەل ۋنيۆەرسيتەتتەرى فيليالىندا «قازاق ءتىلى»، «قازاقستان تاريحى» ءپانىن وقىتۋ مىندەتتەلەتىنى بەلگىلى بولعان ەدى.
اۆتور
داۋلەت ىزتىلەۋ
