ەلىمىزدىڭ ايماقتارىنان استاناعا قالاي جەتۋگە بولادى
قازاقستاننىڭ استاناسىنا ايماقتاردان كۇن سايىن ادام اعىلىپ بارادى. اسىرەسە مەيرام جانە دەمالىس كۇندەردە ەلوردادا قىدىرۋ ءۇشىن جولعا شىعاتىن ادام كوپ. ءبىر ايتا كەتەرلىگى استاناعا جەتۋ كەيدە وڭاي ەمەس. ماسەلەن مەيرام كۇندەرى قوسىمشا پويىز شىعارادى. Kazinform اگەنتتىگىنىڭ ءتىلشىسى استاناعا جەتۋ جولى مەن بيلەت قۇنىن سارالاپ كوردى.
باعا مەن تاسىمال ءتۇرىن تاڭداعان كەزدە قازاقستاننىڭ بەس ايماعىنا باسىمدىق بەرىلدى. تىزىمگە الماتى، شىمكەنت، اقتوبە، پەتروپاۆل، وسكەمەن قالالارى ەندى. سونىمەن بىرگە بيلەت باعاسىن قاراعان كەزدە كۇنى بۇرىن قامدانىپ، ۋاقىتتى ءدال بەلگىلەۋدىڭ ماڭىزدى ەكەنىن كورۋگە بولادى. ايتا كەتەيىك، ۇشۋ بيلەتىنىڭ قۇنى كۇن سايىن وزگەرەدى. سارالاۋ كەزىندە ورتا ەسەپ الىندى.
شىمكەنتتەن استاناعا پويىزبەن بارۋ ءتيىمدى بولىپ تۇر. پلاتسكارتقا بيلەت الۋ ءۇشىن ءبىر ادامعا 8707 تەڭگە قاجەت. ال كۋپە قۇنى ەرەسەك ادامعا 13364 تەڭگە بولىپ تۇر. ەگەر پويىزدىڭ تارسىلى ۇناماسا، اۆتوبۋسپەن قاتىناۋعا بولادى. باعاسى 15000 تەڭگە تۇرادى. ال تاكسي قىزمەتى ودان 5000 تەڭگەگە قىمبات. InDrive جۇرگىزۋشىلەرى ورتا ەسەپپەن ءبىر ادامدى 20000 تەڭگەگە جەتكىزىپ بەرەدى. ال ۇشاق بيلەتىنىڭ قۇنى ودان جوعارى. اۋە كەمەسىنىڭ بيلەت قۇنى - 22500 تەڭگە. ءبىر كۇن بۇرىن بيلەت الساڭىز، 60000 تەڭگە تۇرادى.
ال قازاقستاننىڭ باتىسىنان، سونىڭ ىشىندە اقتوبەدەن استاناعا جەتۋ وڭاي ەمەس. اۆتوبۋس جايىن ايتار بولساق، مۇلدە قاتىنامايدى. سول سەكىلدى استانادان ايماققا دا اۆتوبۋس جۇرمەيدى. مۇندا دا ەڭ ءتيىمدى جولى پويىز بولىپ تۇر. پلاسكارت بيلەتىنىڭ باعاسى - 8052 تەڭگە. ال كۋپە 12304 تەڭگە تۇرادى. ءبىراق ول ءۇشىن پويىزعا ءتۇسىپ، ءمىنۋ كەرەك.
ۇشاقپەن تەز جەتۋدى جوسپارلاعان ادام الدىن الا بيلەت السا 26000 تەڭگە تولەيدى. استاناعا جەتۋ جولى تاكسي قىزمەتىندە دە قىمبات. مۇندا ءبىر ادامعا 30000 تەڭگە سۇرايدى.
الماتىدان استاناعا كولىكتىڭ ءبارى قاتىنايدى. باعا دا ءارتۇرلى. مۇندا جولاۋشى كولىك ءتۇرىن قالتاسىنا قاراي تاڭداسا بولادى. بيلەت قۇنى پويىزداعى پلاسكارتقا 7733 تەڭگەدەن باستالادى. ال كۋپە 11683 تەڭگە تۇرادى. اۆتوبۋسپەن قاتىناۋ قۇنى ءبىر ادامعا - 10700 تەڭگە.
ايتا كەتەيىك، بۇل ەكى قاتىناس قۇرالىنا ۋاقىت كوپ جوعالتاسىز. ال ساپاردى ەرتەرەك جوسپارلاپ، الدىن الا الىپ قويساڭىز اۋە بيلەتى 15000 تەڭگەدەن باستالادى. جايلى قاتىناستىڭ تاعى ءبىر ءتۇرى - تاكسي قىزمەتى. ءبىر ادامدى تاسىمالداۋ 15000 - 20000 تەڭگە تۇرادى.
استاناعا اپارار تاعى ءبىر جول - پەتروپاۆل. بۇل جەردە ەلوردامەن اراداعى قاشىقتىق وزگەلەرگە قاراعاندا جاقىن. سوعان سايكەس باعا دا تومەن. پويىزداعى پلاتسكارت بيلەتىنىڭ قۇنى 3549 تەڭگە تۇرادى. وعان مىڭ جارىم تەڭگە قوسساڭىز، ياعني، 5102 تەڭگەگە كۋپەگە بيلەت ساتىپ الاسىز. ەكىنشى ورىندا ارزان قاتىناس قۇرالى اۆتوبۋس بولىپ تۇر. استاناعا جەتۋ قۇنى 6000 تەڭگە تۇرادى. ال تاكسي قىزمەتى مۇندا ءبىر ادامعا 10000 تەڭگە. بۇل وزگە وڭىرلەرگە قاراعاندا ەڭ تومەن باعا. ال ۇشاق بيلەتىنىڭ قۇنى 15000 تەڭگەدەن باستالىپ تۇر.
ەلىمىزدىڭ شىعىس بولىگى استاناعا تەز ءارى ارزان باعاعا جەتە الادى. ماسەلەن وسكەمەننەن استانا قالاسىنا جەتۋ ءۇشىن پويىزداعى پلاتسكارت بيلەتىنىڭ قۇنى 4698 تەڭگە تۇرادى. ال كۋپە باعاسى 6867 تەڭگە تۇرادى. مۇندا دا اقتوبە قالاسى سياقتى بىرىنەن ەكىنشىسىنە الماسىپ مىنۋگە تۋرا كەلەدى. ەكىنشى ءتيىمدى قاتىناس قۇرالى - اۆتوبۋس. مۇندا جەرگىلىكتى اۆتوۆوكزالدا ءبىر ادامعا بيلەت قۇنى 10000 تەڭگە تۇرادى. ال تاكسي مەن ۇشاق باعاسى بىركەلدى. ءبىر جولاۋشىعا - 15000 تەڭگە.
ايتا كەتەيىك باعانى سالىستىرۋ كەزىندە بيلەتتى بىرنەشە كۇن بۇرىن ساتىپ الۋعا باسىمدىق بەرىلدى. ەگەر تىعىز شارۋا شىعىپ، شۇعىل جولعا شىعۋ كەرەك بولسا ۇشاق بيلەتىنىڭ باعاسى ەكى ەسەلەنەدى. پويىزعا بيلەتتى بىرنەشە اي بۇرىن ساتىپ الساڭىز، ارزانعا تۇسەدى. ال كەش قالساڭىز مۇلدە بيلەت تاپپايسىز. مۇندايدا تاسىمالداۋشى كومپانيا كەيدە قوسىمشا ۆاگون تىركەپ، كەيدە بۇل باعىتقا تاعى پويىز قوسادى.
اۆتور
التىناي ساعىندىقوۆا
