ەلىمىزدەگى اۋەجايلار مەن ۆوكزالداردا قاۋىپسىزدىك جاعدايى تەكسەرىلىپ جاتىر

استانا. KAZINFORM - ق ر ىشكى ىستەر ءمينيسترىنىڭ ورىنباسارى سانجار ءادىلوۆ الماتى اۋەجايىندا 7-ناۋرىزدا بولعان وقيعاعا قاتىستى پىكىر ءبىلدىردى.

سول كەزدە الماتى اۋەجايىندا جولاۋشى قىزمەتكەردىڭ شاشىنان تارتىپ، كوپشىلىك الدىندا پىشاق كەزەنگەن ەدى.

س. ءادىلوۆتىڭ ايتۋىنشا، اۋەجاي - ادام كوپ بولاتىن ستراتەگيالىق نىسان. بۇل تۇرعىدا پوليتسيا الگوريتم بويىنشا جۇمىس ىستەدى.

- قازىرگى كەزدە اۋقىمدى تەكسەرۋ ءجۇرىپ جاتىر. قىلمىستىق ءىستى تەرگەۋ جانە قىزمەتتىك تەكسەرۋ ناتيجەلەرى بويىنشا اۋەجايدىڭ بارلىق قىزمەتتەرىنە، سونىڭ ىشىندە اۆياتسيالىق قاۋىپسىزدىك قىزمەتىنە قۇقىقتىق باعا بەرىلىپ، تارتىپتىك جانە باسقا دا زاڭدى جاۋاپكەرشىلىككە تارتىلادى، - دەدى ءمينيستردىڭ ورىنباسارى.

بۇل رەتتە ول قازىر اتالعان وقيعا بويىنشا ءۇش قىلمىستىق ءىس تىركەلگەنىن ەسكە سالدى.

تەرگەۋ امالدارى جالعاسىپ جاتىر. كۇدىكتى ادام قاماۋدا وتىر.

- اتاپ ايتقاندا، ىشكى ىستەر ءمينيسترى ەرجان سادەنوۆتىڭ تاپسىرماسىمەن ەلدەگى اۋەجايلار مەن ۆوكزالدارداعى قاۋىپسىزدىك جۇيەسى تەكسەرىلىپ جاتىر. سونىمەن قاتار، بۇل باعىتتا نورماتيۆتىك- قۇقىقتىق سالادا تۇزەتۋلەردى قابىلداۋ كەرەك دەپ سانايمىز. وسى رەتتە وتكىر زاتتاردى انىقتايتىن جابدىقتاردى نىساننىڭ كىرەبەرىسىنە ورنالاستىرۋ ەسكەرىلگەن، - دەدى س. ءادىلوۆ.

ايتا كەتەيىك، الماتى اۋەجايىندا جولاۋشى قىزمەتكەردىڭ شاشىنان تارتىپ، كوپشىلىك الدىندا پىشاق كەزەنگەن ەدى.

الماتى حالىقارالىق اۋەجايىندا كەپىلگە الىنعان قىزمەتكەردى ەرلىكپەن قۇتقارىپ قالعان مۇسا ءابدىرايىم بۇكىلالەمدىك بوكس كەڭەسىنىڭ (WBC) بەيبىتشىلىك ەلشىسى بولىپ تاعايىندالدى.

اۆتور

رۋسلان عابباسوۆ