ەلىمىزدەگى 11 سۋ قويماسى 100 پايىز تولىپ تۇر

су қоймасы
Фото: gov.kz

استانا. KAZINFORM - ەلىمىزدەگى 11 سۋ قويماسى 100 پايىز تولىپ تۇر. بۇل تۋرالى سۋ رەسۋرستارى جانە يرريگاتسيا مينيسترلىگىنەن ءمالىم ەتتى.

«ەلىمىزدەگى بارلىق سۋ قويماسى قازىرگى كەزدە مينيسترلىكتىڭ ءجىتى نازارىندا تۇر. سۋ تاسۋ كەزەڭى قارقىندى ءجۇرىپ جاتقان وزەندەر بويىنداعى سۋ قويمالارىنا قاتىستى اقپاراتتى كۇندەلىكتى الىپ وتىرمىز. بۇگىن تاڭعى 8-00-دەگى اقپاراتقا سايكەس، 11 سۋ قويماسى (قوياندى، اقەشكى، كازتالوۆ، شاعان، اشىسۋ، جارتاس، جەزدى، سامارقاند، جەلقۋار، سەرگەيەۆ، امانگەلدى) 100 پايىزعا تولىپ تۇر»، - دەپ اتاپ ءوتتى مينيسترلىكتەن اگەنتتىك ءتىلشىسىنىڭ ساۋالىنا وراي.

ۆەدومستۆو مالىمەتىنشە، اتالعان سۋ قويمالارى ترانزيتتىك رەجيمدە جۇمىس ىستەپ تۇر. ياعني قويماعا قانشا سۋ كەلسە، سونشا مولشەردەگى سۋ قويمانىڭ تومەنگى بولىگىنە اعىزىلىپ جاتىر. قويماعا كەلىپ تۇسەتىن سۋ مولشەرى ازايعان جاعدايدا اعىزىلاتىن سۋدىڭ مولشەرى دە ازايتىلادى.

«سونداي-اق، قويمالاردان تومەن ورنالاسقان وبەكتىلەر مينيسترلىكتىڭ باقىلاۋىندا جانە قويمالاردان اعىزىلاتىن سۋ مولشەرىن سۋ شارۋاشىلىعى كوميتەتى رەتتەيدى. سۋ رەسۋرستارىن وسىلاي رەتتەۋ قويمانى جانە ودان تومەن ورنالاسقان ەلدى مەكەندەردى سۋ باسۋ قاۋپىنەن ساقتاۋعا مۇمكىندىك بەرەدى»، - دەپ ناقتىلايدى سۋ مينيسترلىگى.

سوڭعى جاڭالىقتار