ەلىمىزدە زەينەتاقى قانشا پايىز ءوستى
استانا. KAZINFORM — ەلىمىزدە بۇگىننەن باستاپ بازالىق زەينەتاقى 6,5 پايىزعا، ىنتىماقتى زەينەتاقى — 8,5 پايىزعا يندەكستەلدى.
2025 — 2027-جىلدارعا ارنالعان رەسپۋبليكالىق بيۋجەت تۋرالى زاڭدا 1-قاڭتاردان باستاپ مەملەكەتتىك جاردەماقىلار مەن بازالىق زەينەتاقى تولەمدەرىنىڭ بارلىق ءتۇرىن ق ر ۇلتتىق بانكى ايقىندايتىن ينفلياتسيانىڭ بولجامدى دەڭگەيىنە سايكەس 6,5 پايىزعا، ىنتىماقتى زەينەتاقىنى — 8,5 پايىزعا، ياعني ينفلياتسيا دەڭگەيىنەن 2 پايىزعا وزا وتىرىپ ارتتىرۋ كوزدەلگەن.
بۇدان باسقا مەملەكەت باسشىسىنىڭ تاپسىرماسى بويىنشا 2023-جىلدان باستاپ بەس جىل ىشىندە ەڭ تومەن بازالىق زەينەتاقىنى ەڭ تومەن كۇنكورىس دەڭگەيىنىڭ 70 پايىزنا دەيىن، ەڭ جوعارىسىن — 120 پايىزىنا دەيىن جىل سايىن كەزەڭ-كەزەڭىمەن ارتتىرۋ كوزدەلگەن.
سوعان ساي بۇگىننەن باستاپ بازالىق زەينەتاقىنىڭ ەڭ تومەن مولشەرى ەڭ تومەن كۇنكورىس دەڭگەيىنىڭ 65 پايىزنان 70 پايىزعا دەيىن ۇلعايتىلىپ، 32360 تەڭگەنى قۇرادى. ەڭ جوعارى مولشەرى ەڭ تومەن كۇنكورىس دەڭگەيىنىڭ 105 تەن 110 پايىزىنا دەيىن ارتتىرىلىپ، 50851 تەڭگەنى قۇرادى.
مىسالى، 2019-جىلى زەينەتكەرلىككە شىققان 69 جاستاعى زەينەتكەردىڭ 2024-جىلى بيۋجەتتەن تولەنەتىن زەينەتاقى مولشەرى 156856 تەڭگەنى قۇرادى، ونىڭ ىشىندە بازالىق زەينەتاقى تولەمى
— 45578 تەڭگە، ىنتىماقتى زەينەتاقى — 111278 تەڭگە.
2025-جىلعى 1-قاڭتاردان باستاپ ءوسىمدى ەسكەرە وتىرىپ، وسى زەينەتكەر ءۇشىن زەينەتاقىنىڭ جالپى سوماسى 171588 تەڭگەگە دەيىن ۇلعايادى، ونىڭ ىشىندە بازالىق زەينەتاقى — 50851 تەڭگەنى، ىنتىماقتى زەينەتاقى — 120737 تەڭگەنى قۇرايدى.
اتالعان سومالارعا ب ج ز ق- داعى تولەمدەر كىرمەيتىنىن اتاپ ءوتۋ ماڭىزدى.
2025-جىلى زەينەت جاسى وزگەرمەيدى: ەرلەر — 63 جاس، ايەلدەر — 61 جاس.
