ەلىمىزدە وقۋعا بارماي جۇرگەن بالالار انىقتالىپ جاتىر - پروكۋراتۋرا
ق ر باس پروكۋراتۋراسى قوعامدىق مۇددەلەردى قورعاۋ قىزمەتى باسشىسىنىڭ ورىنباسارى ساكەن سامەت ەلىمىزدە وقۋعا بارماي جۇرگەن بالالار انىقتالىپ جاتقانىن ايتتى، دەپ حابارلايدى Kazinform.
«بيىلعى جينالىستا ەڭبەك جانە حالىقتى الەۋمەتتىك قورعاۋ مينيسترلىگى وتباسىنىڭ سيفرلىق كارتاسىن تانىستىردى. سول باعدارلامانى زەردەلەۋ ناتيجەسىندە ەلىمىزدە 1 مىڭعا جۋىق بالانىڭ ەشقانداي الەۋمەتتىك مارتەبەسى بەلگىلەنبەگەنى انىقتالدى. بۇل جۇمىسقا تىكەلەي پروكۋرورلار ارالاسىپ، قازىر ولاردىڭ ءارقايسىسى قايدا وقيتىنى، قاي بالاباقشاعا بارعانى انىقتالىپ، ءتيىستى جۇمىس اتقارىلىپ جاتىر»، - دەدى س. سامەت سەناتتا كامەلەتكە تولماعانداردىڭ قۇقىقتارى مەن زاڭدى مۇددەلەرىنىڭ ساقتالۋىن قامتاماسىز ەتۋ ماسەلەسىن تالقىلاۋ كەزىندە.
بۇل تۇرعىدا ول وسى ماسەلەگە بالا قۇقىقتارى جونىندەگى ۋاكىل جانە ونىڭ وڭىرلەردەگى وكىلدىكتەرى اتسالىسىپ جاتقانىن ايتتى.
«دەگەنمەن وسى باعدارلامانى زەردەلەۋ ناتيجەسىندە تۋىسقاندارى بالانى ءبىر-بىرىنە بەرىپ جىبەرگەن دەرەكتەر، ءومىرى بالاباقشاعا جانە وقۋعا بارماعان بالالار انىقتالدى. سوندىقتان پروكۋرورلار جۇمىسى اياسىندا ولاردىڭ ءبارىنىڭ قۇقىقتارى قورعالىپ جاتىر»، - دەدى ساكەن سامەت.
