ەلىمىزدە تۇرعىن ءۇيدى پايدالانۋعا بەرۋ كولەمى ارتىپ كەلەدى

Тұрғын үй
Фото: Фото: Kazinform

 وسى جىلدىڭ 9 ايىندا 11،7 ميلليون شارشى مەتر تۇرعىن ءۇي پايدالانۋعا بەرىلدى. بۇل تۋرالى بۇگىن ۇكىمەت وتىرىسىندا ۇلتتىق ەكونوميكا ءمينيسترى الىبەك قۋانتىروۆ ايتتى، دەپ حابارلايدى Kazinform اگەنتتىگىنىڭ ءتىلشىسى. 

ءمينيستردىڭ دەرەگىنشە، وسى جىلدىڭ 9 ايىندا وڭدەۋ ونەركاسىبىندە وڭ ءوسۋ ساقتالىپ وتىر. ءوندىرىس كولەمى 3,2 پايىزعا ءوستى. كورسەتكىشتىڭ ءوسۋى 14 وڭىردە تىركەلدى. ونىڭ ىشىندە ەڭ جوعارعى ءوسۋدى الماتى قالاسى جانە باتىس قازاقستان، قوستاناي، قىزىلوردا وبلىستارى كورسەتتى. وڭدەۋ ونەركاسىبى سالالارى بويىنشا ماشينا جاساۋ ءوندىرىسىنىڭ 27,3 پايىزعا، ونىڭ ىشىندە اۆتوموبيل جاساۋدىڭ - 40,8 جانە ەلەكتر جابدىقتارىن جاساۋدىڭ 30,6 پايىزعا ءوسۋى قامتاماسىز ەتىلدى.

«سونداي-اق ءوسۋ كەلەسى سالالاردا بايقالىپ وتىر: ازىق- تۇلىك ءوندىرىسى - 3،3، حيميا ونەركاسىبى - 1,5، مەتالل بۇيىمدارى - 4,2، سۋسىندار ءوندىرىسى - 3,2، پلاستماسسا بۇيىمدارى - 6,8، جەڭىل ونەركاسىبى - 14,6 پايىز. تاۋ- كەن ونەركاسىبىندەگى ءوندىرىس كولەمى 5,4 پايىزعا جوعارلادى. بۇل رەتتە مۇناي ءوندىرۋ - 8,4، گاز ءوندىرۋ - 6,1، وزگە دە پايدالى قازبالاردى ءوندىرۋ 13,9 پايىزعكا ءوستى. مەتالل كەندەرىن ءوندىرۋ - 1,2، تاۋ-كەن ونەركاسىبىندە قىزمەت كورسەتۋ - 1,7، كومىر ءوندىرۋ 5،7 پايىزعا تومەندەدى»، - دەدى ول.

الىبەك قۋانتىروۆتىڭ ايتۋىنشا، ورىندالعان قۇرىلىس جۇمىستارىنىڭ كولەمى 12,6 پايىزعا ۇلعايدى. 19 وڭىردە وڭ ءوسۋ تىركەلدى، اسىرەسە قۇرىلىس- مونتاجداۋ جۇمىستارىنىڭ ەڭ كوپ ءوسۋى ماڭعىستاۋ، جەتىسۋ، اباي جانە باتىس قازاقستان وبلىستارىندا بايقالدى. قاڭتار- قىركۇيەكتە 11،7 ميلليون شارشى مەتر تۇرعىن ءۇي پايدالانۋعا بەرىلدى. بۇل وتكەن جىلدىڭ سايكەس كەزەڭىمەن سالىستىرعاندا 11,6 پايىزعا جوعارى. ەڭ جوعارى كورسەتكىش استانا قالاسىندا، سونداي-اق ۇلىتاۋ، قىزىلوردا جانە اباي وبلىستارىندا تىركەلدى.

«اۋىل شارۋاشىلىعىنىڭ جالپى شىعارىلىمى 9,9 پايىزعا تومەندەدى. كورسەتكىشتىڭ كۇرت تومەندەۋى اۋا رايىنىڭ قولايسىزدىعىنا بايلانىستى ءداندى داقىلداردى جيناۋ كولەمىنىڭ ازايۋىنان ورىن الدى. بارلىق 7 ەكونوميكالىق كورسەتكىش بويىنشا وڭ ءوسۋ 5 وڭىردە - اباي، باتىس قازاقستان، قىزىلوردا وبلىستارىندا، سونداي-اق الماتى جانە شىمكەنت قالالارىندا بايقالدى»، - دەدى مينيستر.

سوڭعى جاڭالىقتار