ەلىمىزدە تەك قىز-كەلىنشەكتەرگە ارنالعان اۆتومەكتەپ اشىلدى

ەلىمىزگە بەلگىلى پسيحولوگ ۇلدانا ءادىلحان قىزى تەك قانا قىز-كەلىنشەكتەرگە ارنالعان اۆتومەكتەپتىڭ اشىلۋ سالتاناتىن وتكىزدى. ۇلدانا ەلىمىزدە نازىك جاندىلارعا ارنالعان العاشقى اۆتومەكتەپتىڭ نەگىزىن قالاۋشى، دەپ حابارلايدى El.kz اقپارات اگەنتتىگى.

ۇلدانانىڭ مۇنداي قادامعا بارۋىنا ءبىراز نارسە تۇرتكى بولعان. كولىك جۇرگىزەتىن ايەلدەرگە دەگەن ەر ادامداردىڭ جاعىمسىز كوزقاراسى، ايەلدەردى كولىكتى دۇرىس جۇرگىزبەگەنى ءۇشىن كەلەكە ەتىپ، كەمسىتۋ سىندى جايتتاردان بولەك، قازاقتىڭ قىز-كەلىنشەكتەرىنىڭ دوربا ارقالاپ، اۆتوبۋستا ارتىنىپ-تارتىنىپ ءجۇرۋى دە كەيىپكەرىمىزگە قاتتى ەسەر ەتكەن.

«نەگىزى، بۇل اۆتومەكتەپتى اشۋدى كوپتەن ماقسات ەتىپ ءجۇردىم. ونىڭ ۇستىنە، ماماندىعىمنىڭ ارتىقشىلىعىن دا پايدالانعىم كەلدى. ءوزىم پسيحولوگ بولعاندىقتان، رۋلگە جاڭا وتىرعان قىز- كەلىنشەكتەردىڭ قورقىنىشىن جەڭۋگە كومەكتەسكىم كەلدى. وسى ويىمدى جازدان باستاپ جۇزەگە اسىرىپ، اۆتومەكتەپتىڭ جۇمىسىن باستاپ كەتتىم. بۇگىندە ەكى جۇزدەن اسا قىز-كەلىنشەك ءبىلىم الىپ ۇلگەردى. جاقىندا سەگىز قاتىسۋشىمىز ەشقانداي تامىر-تانىسسىز، ءوز بىلىمىمەن كولىك جۇرگىزۋ قۇجاتىن الدى»، - دەيدى ول.

ۇلدانا ءادىلحان قىزى 8-سىنىپتان باستاپ كولىك جۇرگىزىپ، ۇيرەنگەن. ال ءوزىنىڭ رەسمي تۇردە رۋلگە وتىرعانىنا 9 جىل تولىپتى. وسى ارالىقتا ول بىردە-ءبىر رەت جول ەرەجەسىن بۇزباعان.

«ايەلدەردىڭ كولىك تىزگىندەۋى - زامان تالابى. ودان باسقاشا استار ىزدەۋدىڭ قاجەتى جوق. تاڭەرتەڭ بالا-شاعاسىن مەكتەپكە تاسيتىن، ولاردى قايتادان ۇيگە اپ كەلەتىن، جۇمىستىڭ، ءۇيدىڭ شارۋاسىمەن ءارى-بەرى شاپقىلايتىن كىم؟ ارينە، ايەل ادام. سوندىقتان، ءاربىر قازاقستاندىق قىز-كەلىنشەكتىڭ تەمىر تۇلپاردى جۇرگىزىپ ۇيرەنگەنى دۇرىس. ارينە، كوپشىلىگىندە قورقىنىش بار. مۇنىڭ بولۋى دا زاڭدى. تەك سول قورقىنىشتى جەڭۋدىڭ جولدارىن دۇرىستاپ ۇيرەنسە بولعانى... قازىر اينالامىزدا كولىك جۇرگىزەتىن نازىك جاندىلار كوبەيىپ كەلە جاتىر. ءاربىر ايەل، ءاربىر انا كولىك جۇرگىزىپ ۇيرەنسە دەگەن تىلەگىم بار»، - دەيدى ۇلدانا.

قازىرگى تاڭدا الماتىداعى اۆتومەكتەپ رەسمي تۇردە اشىلدى. ەندى جاقىن ارادا تەك قىزدارعا ارنالعان اۆتومەكتەپ تاراز قالاسىندا جۇمىسىن باستاماق.