ەلىمىزدە تاعى ءبىر اۋىل الكوگولدەن باس تارتپاق

اقتاۋ. KAZINFORM - ماڭعىستاۋ وبلىسى ءتۇپقاراعان اۋدانىنىڭ اكىمى تاۋشىق اۋىلىن «الكوگولسىز اۋىلعا» اينالدىرۋدى ۇسىندى، دەپ حابارلايدى ماڭعىستاۋ وبلىسىنىڭ قوعامدىق كوممۋنيكاتسيا ورتالىعىنىڭ باسپا ءسوز قىزمەتى.

باسپا ءسوز قىزمەتىنىڭ مالىمەتتەرىنە قاراعاندا، بۇگىندە تاۋشىق اۋىلىندا 3363 تۇرعىن تىركەلگەن. اۋىل تۇرعىندارىنا 1 امبۋلاتوريا، 2 جەكە مەديتسينا ورتالىعى قىزمەت كورسەتەدى. 3 بالاباقشا 1-6 جاس ارالىعىنداعى بۇلدىرشىندەرگە مەكتەپكە دەيىنگى تاربيە بەرۋدە. بۇگىندە بالالاردى بالاباقشامەن قامتۋ %100 دى قۇرايدى. جالپى ءبىلىم بەرەتىن شاحتا مەكتەبىندە 2024-2025 وقۋ جىلىن 722 وقۋشى باستادى.

ءتۇپقاراعان اۋدانىنىڭ اكىمى راحات ەلتيزاروۆ جەرگىلىكتى تۇرعىندارمەن كەزدەسۋلەرىنىڭ ءبىرىنىڭ بارىسىندا اقساقالدارعا تاۋشىق اۋىلىن «الكوگولسىز اۋىلعا» اينالدىرۋدى ۇسىندى.

- ارداقتى ارداگەرلەر! سىزدەرگە ىشكى مادەنيەتتى دامىتىپ، كورشى اۋدانداردا جۇرگىزىلىپ جاتقان جاقسى ءۇردىس بويىنشا تاۋشىق اۋىلىن «الكوگولسىز اۋىل» رەتىندە كوپكە ۇلگى ەتىپ، الكوگولدى ىشىمدىكتەردەن باس تارتۋعا ارنالعان جۇمىستاردى جۇرگىزۋگە ۇسىنىس بىلدىرەمىن، - دەپ اتاپ ءوتتى راحات ەلتيزاروۆ.

وسىعان دەيىن ىشكى ىستەر ءمينيسترىنىڭ ورىنباسارى يگور لەپەحا الكوگولدىك ىشىمدىكتەن تولىقتاي باس تارتقان اۋىلداردىڭ سانىن جاريالاعان بولاتىن.

ونىڭ مالىمەتتەرىنە سۇيەنسەك، بۇل ماڭعىستاۋ وبلىسىندا ىشىمدىكتەن باس تارتقان ءبىرىنشى اۋىل ەمەس.