ەلىمىزدە تابىسى جوق جاستارعا نەسيە بەرۋگە شەكتەۋ ەنگىزىلمەك
قازاقستاندا تابىس كوزىن كورسەتەتىن قۇجاتسىز جاستارعا نەسيە بەرۋگە تىيىم سالىنباق. بۇل تۋرالى ءماجىلىس دەپۋتاتى بەرىك بەيسەنعاليەۆ ايتتى، دەپ حابارلايدى Kazinform.
«نەسيە بەرۋ كەزىندە بانك قارىزدى كىمدەر الىپ جاتقانىنا قاراۋى كەرەك. وندا ءتيىستى تارماق ەسكەرىلگەن. 21 گە تولماعان ادام ونلاين-كەرەديت الۋ كەزىندە ونى قاي تابىس كوزى ارقىلى وتەيتىنىن كورسەتۋى كەرەك. قازىر اقشاسى مەن جالاقىسى بولماسا دا، بىرنەشە نەسيە الىپ جاتقان ستۋدەنتتەر كوپ. ارينە، تابىس كوزى بولماسا، نەسيەنى وتەي المايتىنى تۇسىنىكتى جاعداي»، - دەدى ب. بەيسەنعاليەۆ اگەنتتىك ءتىلشىسىنىڭ سۇراقتارىنا جاۋاپ بەرە وتىرىپ.
دەپۋتاتتىڭ ايتۋىنشا، ستۋدەنتتەر ءبىر نەسيە الىپ، ەكىنشىسىن جابۋعا پايدالانادى.
«ءبىر نەسيە الىپ، ونىمەن ەكىنشىسىن جاۋىپ تاستايدى. وسىلاي قارىزدارى جيناقتالا بەرەدى. بۇعان جول بەرمەۋ ءۇشىن ءتيىستى شەكتەۋ قاراستىرىلعان. كىرىستى راستايتىن قۇجاتسىز 21 جاسقا تولماعان ادامعا نەسيە بەرۋگە تىيىم سالىنادى»، - دەپ ءتۇسىندىردى بەرىك بەيسەنعاليەۆ.
بۇگىن حابارلانعانىمىزداي، پارلامەنت ءماجىلىسىنىڭ قاراۋىنا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەنگىزىلدى.
بۇل قۇجاتتا نەسيەلەر بويىنشا مەرزىمى وتكەن بەرەشەگى بولعان جاعدايدا ازاماتتارعا جاڭا تۇتىنۋشىلىق نەسيەلەر بەرۋگە تىيىم سالۋ، 90 كۇن كەشىكتىرىلگەننەن كەيىن بارلىق نەسيە بويىنشا پايىزداردى ەسەپتەۋگە تىيىم سالۋ، سونداي-اق بانكتەر مەن ميكروقارجى ۇيىمدارىنىڭ كوللەكتورلىق اگەنتتىكتەرىنە ازاماتتاردىڭ نەسيەلەرىن ساتۋىنا شەكتەۋ ەنگىزۋ جانە تاعى دا باسقا نورمالار قاراستىرىلعان.
