ەلىمىزدە سۋ تاپشىلىعى بار - پرەزيدەنت

Akorda
Photo: Akorda

  استانا. KAZINFORM - الماتى قالاسى اكىمدىگىنىڭ مالىمەتىنە سايكەس بيىل قارعالى توعانىنىڭ قۇرىلىسىن اياقتاۋ جوسپارلانىپ وتىر.

بۇل تۋرالى مەملەكەت باسشىسى قاسىم-جومارت توقايەۆتىڭ توراعالىعىمەن وتكەن الماتى قالاسىندا سەيسميكالىق قاۋىپسىزدىكتى قامتاماسىز ەتۋ ماسەلەلەرى جونىندە كەڭەستە ايتىلدى.

بۇل نىسان ناۋرىزباي اۋدانىنىڭ 50 مىڭ تۇرعىنىن اۋىزسۋمەن قامتاماسىز ەتەدى. كەلەسى جىلى اقساي توعانىنىڭ قۇرىلىسىن اياقتاۋ كوزدەلۋدە. ول ناۋرىزباي اۋدانىنداعى 100 مىڭ تۇرعىن مەن الماتى وبلىسى قاراساي اۋدانىنداعى 15 مىڭ تۇرعىننىڭ سۋعا قاتىستى ماسەلەسىن شەشۋگە سەپتىگىن تيگىزەدى.

قاسىم- جومارت توقايەۆ الماتى قالاسىن سۋمەن قامتاماسىز ەتۋ جالپىمەملەكەتتىك ماڭىزى بار باسىم مىندەت ەكەنىن اتاپ ءوتتى. سونىمەن قاتار بىلتىر الماتى قالاسىنىڭ مەدەۋ اۋدانىندا بولعان جاعدايدىڭ قايتالانۋىنا جول بەرۋگە بولمايتىنىن ەسكەرتتى.

- ەلىمىزدە سۋ تاپشىلىعى بار. بىزگە جالپى مەملەكەتتىك باعدارلاما قاجەت. باۋ- باقشانى سۋارۋ ءۇشىن اۋىزسۋدى پايدالانۋعا بولمايدى. ونىڭ ورنىنا سۋ ۇنەمدەۋ تەحنولوگياسىن قولدانىسقا ەنگىزىپ، جەر استىنان جاڭا سۋ كوزدەرىن ىزدەۋ قاجەت. الماتىنىڭ تۇرعىندارى اۋىزسۋدىڭ تاپشىلىعىنا ءجيى شاعىمدانادى. سوندىقتان كەشەندى، جۇيەلى جۇمىس جۇرگىزىلۋى كەرەك،- دەدى پرەزيدەنت.

سوڭعى جاڭالىقتار