ەلىمىزدە قىتايدىڭ تاعى 3 كولىك ماركاسى قۇراستىرىلۋى مۇمكىن

استانا. KAZINFORM - ەلىمىزدە تاعى ءۇش قىتايلىق اۆتوكولىك ماركاسى ءوندىرىلۋى مۇمكىن. ونەركاسىپ جانە قۇرىلىس ءمينيسترى قانات شارلاپايەۆ ۇكىمەت وتىرىسىندا قازىر بۇل ماسەلە ءجىتى پىسىقتالىپ جاتقانىن ايتتى.

«ءبىز وتاندىق اۆتوموبيلدەردىڭ CKD ءادىسىنىڭ وندىرىسىنە نازار اۋدارامىز. بۇل دەگەنىمىز - ەلدە شىعارىلعان اۆتوموبيلدەردە وتاندىق كومپونەنتتەردىڭ ۇلەسىن ارتتىرۋ. وسى باعىتتا، شەتەلدىك جانە وتاندىق ينۆەستورلار ەل اۋماعىندا جاڭا زاۋىتتار سالۋ جۇمىستارى جۇرگىزىلۋدە»، - دەدى ول.

ءمينيستردىڭ سوزىنشە، اتالعان زاۋىتتاردىڭ ءبارى وندىرىستەگى قازاقستاننىڭ ۇلەسىن بىرتىندەپ ارتتىرۋعا مىندەت الادى.

«ماسەلەن، Changan, Haval, Chery اۆتوموبيلدەرىن شىعاراتىن زاۋىتتىڭ قۇرىلىسى اياقتالۋعا جاقىن، بۇل زاۋىتتا CKD ادىسىمەن جىلىنا 90 مىڭ بىرلىك اۆتوكولىك شىعارىلاتىن بولادى. سونىمەن قاتار، 200 ميلليون دوللارلىق KIA اۆتوموبيل زاۋىتىنىڭ قۇرىلىسى جۇرگىزىلىپ، 150 ميلليون دوللارعا Geely،Exeed، kaiyi جەڭىل اۆتوموبيلدەر ءوندىرىسى پىسىقتالۋدا. بۇدان بولەك سەكتوردى ودان ءارى دامىتۋ اۆتوكومپونەنتتەردىڭ وتاندىق ءوندىرىسىن يگەرۋ ەسەبىنەن جوسپارلانۋدا. مىسالى، بيىل الماتى قالاسىندا مۋلتيمەديالىق جۇيەلەردىڭ جانە اۆتوكرەسلولاردىڭ سەريالىق ءوندىرىسىن ىسكە قوسۋ كۇتىلۋدە»، - دەدى قانات شارلاپايەۆ.