ەلىمىزدە قىمىز بەن شۇبات ءوندىرىسى 37 پايىزعا ازايدى
استانا. KAZINFORM - بىلتىر قازاقستاندا 617,7 ميلليارد تەڭگەگە ءسۇت ونىمدەرى شىعارىلدى، ال ءوسىم 22,3 پايىزعا ارتتى. دەگەنمەن قىمىز، شۇبات ءوندىرىسى ازايعان. تولىعىراق Energyprom.kz رەسۋرسىنىڭ تالداۋىندا باياندالعان.
بىلتىر ەلىمىزدە 621 مىڭ توننا ءسۇت پەن كىلەگەي ءوندىرىلدى، بۇل 2023-جىلمەن سالىستىرعاندا 3,7 پايىزعا ارتىق. سونداي-اق سارى ماي مەن ءسۇت ونىمدەرى (4,6 پايىزعا)، مايسىز (30,2 پايىزعا) جانە مايلى (9,2 پايىزعا) سۇزبە، سول سياقتى ۇگىتىلگەن، ۇنتاقتالعان جانە بالقىتىلعان ىرىمشىكتەر (3,5 پايىزعا) ارتىعىمەن ءوندىرىلدى. سونىمەن قاتار يوگۋرت پەن اشىتىلعان ىرىمشىكتەردەن باسقا وڭدەلمەگەن ىرىمشىكتەر، اشىتىلعان ءسۇت پەن كىلەگەي (4 پايىز) شىعارىلدى.
دەگەنمەن قاتتى تۇردەگى ءسۇت ءوندىرىسى، كەرىسىنشە، 6,2 پايىزعا، ياعني 5,2 مىڭ تونناعا دەيىن قىسقاردى. بالقىتىلعان ىرىمشىكتەر (7,2 پايىزعا)، سونداي-اق قىمىز (37,4 پايىزعا) جانە شۇبات (37,9 پايىزعا) ازايدى.
وتكەن جىلدىڭ جەلتوقسان ايىنىڭ قورىتىندىسى بويىنشا ءسۇت ونىمدەرىنىڭ باعاسى ءبىر ايدا 0,7 پايىزعا ءوستى، ءبىر اي بۇرىن 0,7 پايىزعا، ال 2023-جىلدىڭ جەلتوقسانىندا — 0,3 پايىزعا عانا قىمباتتاعانى بايقالدى. ايتا كەتسەك، ءسۇت ونىمدەرىنىڭ باعاسى 2016-جىلدىڭ شىلدەسىنەن باستاپ ءوسىپ كەلەدى.
ءبىر جىل ىشىندە ءسۇت ونىمدەرى 6,1 پايىزعا قىمباتتاپ، باعانىڭ 11,2 پايىزعا ءوسۋى بايقالدى. اتاپ ايتقاندا، ءسۇت 7,4 پايىز، اشىتىلعان ءسۇت ونىمدەرى 6,9 پايىز، ىرىمشىك پەن سۇزبە باعاسى 4,7 پايىزعا، ال كونسەرۆىلەنگەن ءسۇت 3,5 پايىزعا ءوستى.
وتكەن جىلدىڭ قاڭتار-قىركۇيەك ايلارىندا ءسۇت جانە ءسۇت ونىمدەرىن تۇتىنۋ ءاربىر قازاقستاندىققا ورتا ەسەپپەن 173,3 كەلى، بۇل 2023-جىلمەن سالىستىرعاندا 1,6 پايىزعا ارتىق. وڭىرلەرگە كەلسەك، ءسۇت ونىمدەرىنىڭ باسىم بولىگى اقمولا وبلىسىندا تۇتىنىلدى، جان باسىنا شاققاندا 221,2 كەلى. ودان كەيىن شىعىس قازاقستان جانە قاراعاندى وبلىسىنا تيەسىلى. ءسۇت ونىمدەرىن شىمكەنت تۇرعىندارى از تۇتىناتىن بولىپ شىقتى.
2024-جىلدىڭ ءۇشىنشى توقسانىنىڭ قورىتىندىسى بويىنشا حالىقتىڭ ءسۇت ونىمدەرىنە 14,6 مىڭ تەڭگە جۇمساعان. بۇل بارلىق تۇتىنۋ شىعىندارىنىڭ 5,4 پايىز جانە ازىق-تۇلىك پەن الكوگولسىز سۋسىندارعا جۇمسالعان شىعىنداردىڭ 10,8 پايىزىن قۇرايدى.
استانا جانە الماتى تۇرعىندارى ءسۇت جانە ءسۇت ونىمدەرىنە كوپ شىعىندانادى، ال ەڭ از شىعىنداناتىن تۇركىستان وبلىسى بولىپ شىقتى.
ەسكە سالساق، بىلتىر قىمىز ىشكەن ادام الكوتەستەردەن وتسە، ناتيجە قانداي بولاتىنى تۋرالى جازعان بولاتىنبىز.
