ەلىمىزدە قۇمار ويىندارعا تاۋەلدى قانشا ادام بار

استانا. KAZINFORM - ق ر دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ بىلتىردان بەرى لۋدومانيا بويىنشا ەمدەلىپ جاتقاندارعا قاتىستى تۇسىنىك بەردى.

- ءبىر جىل بۇرىن لۋدومانيادان ەمدەۋ مەن دياگنوستيكا حاتتاماسى قابىلدانعان. سودان بەرى 15 جاعدايعا قۇمار ويىندارعا تاۋەلدىلىك دياگنوزى قويىلدى. قۇمار ويىندارعا تاۋەلدى ادامدار وزدەرىن دەرتكە شالدىققانىن مويىندامايدى. ەكىنشىدەن، بىلتىرعا دەيىن ويىنعا تاۋەلدى ءاربىر ادام پسيحيكالىق ساۋىقتىرۋ ورتالىعىندا ديناميكالىق باقىلاۋعا الىناتىن جانە بۇل جاعداي ونىڭ قۇجاتتارىندا كورسەتىلەتىن. سوندىقتان ەشكىم ءوزىنىڭ دەرەكتەرىندە مۇنداي ديناميكالىق باقىلاۋدىڭ بولعانىن قالامايدى، - دەدى تيمۋر سۇلتانعازيەۆ سەناتتا تىلشىلەر سۇراعىنا جاۋاپ بەرە وتىرىپ.

وسىعان بايلانىستى وتكەن جىلى ءتيىستى زاڭ قابىلدانىپ، ونىڭ اياسىندا كونسۋلتاتيۆتىك مونيتورينگتىڭ جاڭا تەتىگى قوسىلدى.

- بۇل جاڭا قادام ادامداردا ەمحاناعا بارۋعا، پسيحياتردان كەڭەس الۋعا جانە قاجەت بولعان جاعدايدا ەمدەلۋگە بارۋدى ىنتالاندىرىپ وتىر، - دەدى ۆيتسە-مينيستر.

بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ، ويىن بيزنەسى جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكى وقىلىمدا قارالىپ، ماقۇلداندى.

ەسكە سالساق، بيىل ناۋرىز ايىندا تۋريزم جانە سپورت ۆيتسە-ءمينيسترى ەرجان ەركىنبايەۆ ەلىمىزدە ميلليون لۋدومان بار دەگەن اقپاراتتى جوققا شىعاردى.