ەلىمىزدە قاي ماماندىقتارعا سۇرانىس جوعارى

استانا. KAZINFORM - ەڭبەك نارىعىندا زاڭگەرلىك ماماندىققا جوعارى سۇرانىس جوق. بۇل تۋرالى ع ج ب م جوعارى جانە جوعارى وقۋ ورنىنان كەيىنگى ءبىلىم كوميتەتىنىڭ ءتوراعاسى گۇلزات كوبەنوۆا ءمالىم ەتتى.

ايتا كەتەيىك، بۇگىن سەناتتا زاڭ ءبىلىمىن دامىتۋ تاقىرىبىنا ارنالعان پارلامەنتتىك تىڭداۋ بارىسىندا زاڭگەر ماماندىعىنا مەملەكەتتىك گرانتىڭ ۇلەسى وتە از بولعاندىقتان، كوبىسى اقىلى نەگىزدە وقۋعا ءماجبۇر ەكەنى ايتىلعان ەدى.

- مەملەكەتتىك گرانتتار بولىنگەن كەزدە، ولاردىڭ سانى ءبىرىنشى كەزەكتە نارىقتاعى سۇرانىسقا وراي قالىپتاسادى. جىل سايىن ەڭبەك مينيسترلىگى بىزگە قاجەت مامانداردىڭ سانىنا قاتىستى مالىمەتتەردى بەرىپ تۇرادى. وسى اقپاراتقا سۇيەنسەك، قازىر جانە الداعى بەس جىلدا ءبىزدىڭ ەكونوميكاعا كوبىنە تەحنيكالىق باعىتتاعى ماماندار مەن پەداگوگتەر، دارىگەرلەر، اۋىل شارۋاشىلىعى ماماندارى قاجەت. ال زاڭگەرلەرگە سونشالىقتى جوعارى سۇرانىس جوق، - دەدى گ. كوبەنوۆا.

ونىڭ ايتۋىنشا، ءقازىر اقىلى نەگىزدە وقيتىن ستۋدەنتتەرگە جوعارى وقۋ ورىندارى وقۋ اقىسىن وزدەرى بەلگىلەيدى.

- 2023-جىلدىڭ كورسەتكىشىن قاراساق، زاڭگەرلىك ماماندىقتى تامامداعان تۇلەكتەردىڭ 72 پايىزى ءوز سالاسى بويىنشا جۇمىسقا ورنالاسقان. 2024-جىلى وقۋدى اياقتاعان تۇلەكتەردىڭ كورسەتكىشى بيىل جازدا ناقتى بەلگىلى بولادى. بۇگىنگى تالاپتار بويىنشا، بيىل وقۋدى بىتىرگەن ستۋدەنتتىڭ ءبىر جىل ىشىندە جۇمىسقا ورنالاسۋى جاعدايىنا تالداۋ جاسايمىز. زاڭگەرلىك باعىتىندا مەملەكەتتىك گرانتپەن وقىعانداردىڭ كوبىسى ءوز ماماندىعىمەن جۇمىسقا ورنالاسىپ جاتىر، - دەدى كوميتەت باسشىسى.

بۇدان بۇرىن حابارلانعانداي، سەنات ءتوراعاسى ماۋلەن اشىمبايەۆ زاڭگەرلەر دايارلاۋ ىسىندە قوردالانعان پروبلەمالار بار ەكەنىن ايتتى.

عىلىم جانە جوعارى ءبىلىم ءمينيسترى ساياسات نۇربەك بۇگىندە زاڭگەر ماماندىعى بويىنشا جوعارى ءبىلىم الىپ جاتقان جاستاردىڭ 97 پايىزى اقىلى نەگىزدە وقيتىنىن ايتتى.