ەلىمىزدە قار ءتۇسىپ، نوسەر جاۋىن جاۋدى
استانا. KAZINFORM - جاز تاياعاندا اۋا رايى قازاقستاندىقتارعا كۇرت كونتينەنتتىك كليماتتا ءومىر ءسۇرىپ جاتقانىن تاعى ءبىر ەسكە سالدى. ەلىمىزدىڭ بىرنەشە وڭىرىندە جاڭبىر ارالاس قار جاۋدى. نازارلارىڭىزعا Kazinform اگەنتتىگىنىڭ تابيعي قۇبىلىستارعا شولۋىن ۇسىنامىز.
بۇگىن اقمولا وبلىسىندا قار جاۋدى. اتاپ ايتقاندا، اقكول جانە ەرەيمەنتاۋ قالاسىندا، سونداي- اق ەلوردا ماڭىنداعى باسقا دا ەلدى مەكەندەردە قالىڭ قار جاۋدى.
اقمولا وبلىسىنىڭ تۇرعىندارى اۋا رايىنىڭ كۇرت وزگەرىسى تۋرالى كورىنىستەردى الەۋمەتتىك جەلىگە جاريالادى.
استانا جانە شىمكەنت قالاسىنىڭ كوشەلەرىن قاتتى جاۋىن-شاشىننان كوشەلەردى سۋ باستى. شىمكەنتكە جاۋعان نوسەردىڭ جويقىن زارداپتارى تۋرالى توتەنشە جاعدايلار مينيسترلىگى حابارلادى.
«داۋىلدىڭ سالدارىنان شىمكەنتتە تەمىرلان تاس جولى مەن احۋنبابايەۆ كوشەسىنىڭ قيىلىسىندا كوپىردى سۋ باستى. جاڭبىر سۋىنىڭ تەرەڭدىگى 50 س م»، - دەلىنگەن ت ج م حابارلاماسىندا.
استانادا نوسەر جاڭبىر سالدارىنان ءبىرقاتار كوشە سۋ استىندا قالدى. ءوز كەزەگىندە ەلوردا اكىمدىگى سۋ باسۋ سەبەپتەرىن ءتۇسىندىردى. اسىرەسە ەلوردادا نوسەر جاڭبىردان «MEGA Silk Way» س و و اۋدانى جانە تۇران داڭعىلىنداعى جولدارعا كوپ زاقىم كەلدى.
ەسكە سالا كەتەيىك، «قازگيدرومەت» دەمالىس كۇندەرى جاۋىن- شاشىن، قار، نايزاعاي، بۇرشاق جانە جەلدىڭ كۇشەيتىندىگىن بولجاعان بولاتىن.
«كەلە جاتقان سۋىق اۋا ماسسالارى تۇندە جانە تاڭەرتەڭ 3 گرادۋسقا دەيىن اياز بولاتىندىعىن ەسكەرتتى. دەمەك 25-مامىردا باتىستا، سولتۇستىك- باتىستا، سولتۇستىكتە، 26-مامىردا ورتالىقتا، 27-مامىردا شىعىستا، وڭتۇستىك- شىعىستا، 26-27-مامىردا وڭتۇستىك قازاقستاننىڭ تاۋلى ايماقتارىندا اۋا تەمپەراتۋراسى تومەندەيدى»، - دەلىنگەن حابارلامادا.
