ەلىمىزدە قانشا نىسان سۋ استىندا قالدى

استانا. KAZINFORM - ەلىمىزدىڭ سۋ باسقان اۋماقتارىندا قۇزىرلى ورگاندار تاۋلىك بويى مىندەتتەرىن ورىنداپ جاتىر. بۇگىندە قۇتقارۋ جۇمىستارىنا 30 مىڭ ادام جانە 3 مىڭ تەحنيكا جۇمىلدىرىلعان.

ورتالىق كوممۋنيكاتسيالار قىزمەتىندە وتكەن بريفينگىدە ق ر توتەنشە جاعدايلار مينيسترلىگى ازاماتتىق قورعانىس جانە اسكەري بولىمدەر كوميتەتىنىڭ اعا وفيتسەرى ەراسىل سايپاش سۋ تاسقىنىنىڭ اعىمداعى جاعدايى تۋرالى باياندادى.

«قۇتقارۋ جۇمىستارىنا 600 گە جۋىق سۋ ايداۋ قۇرىلعىسى مەن سۋ كولىگى، 16 ۇشاق تارتىلدى. سۋ تاسقىنى باستالعاننان بەرى 98 مىڭنان استام ادام قۇتقارىلدى. ونىڭ 33 مىڭى - بالالار. ۋاقىتشا ورنالاستىرۋ ورتالىقتارىندا 7 مىڭ ادام جايعاستىرىلدى. ونىڭ 3364 ءى - بالالار»،-دەدى ول.

بەلگىلى بولعانداي، اتىراۋ، اقتوبە، اقمولا، قوستاناي، سولتۇستىك قازاقستان جانە شىعىس قازاقستان وبلىستارىندا 3497 جەكە تۇرعىن ءۇي، 489 اۋلا اۋماقتارى، 1778 ساياجاي جانە 55 ءتۇرلى ماقساتتاعى عيمارات سۋ استىندا قالعان.