ەلىمىزدە قانداي قىلمىستار ازايدى

استانا. KAZINFORM - ەلىمىزدە قىلمىستىڭ تومەندەۋى بايقالادى. بۇل تۋرالى ق ر ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ جارتى جىلدىق جۇمىس ەسەبىنىڭ قورىتىندىسىن باياندادى.

سپيكەر كەلتىرگەن دەرەكتەرگە سايكەس، دەنساۋلىققا اۋىر زيان كەلتىرۋ 2 پايىزعا؛ ۇرلىق 29 پايىزعا؛ مال ۇرلىعى 33 پايىزعا؛ توناۋ 20 پايىزعا ازايعان. قىلمىستاردىڭ اشىلۋى دا جاقسارعان.

«ۆەدومستۆو «SOS» باتىرمالارىن ورناتۋ جۇمىستارىن جالعاستىرۋدا. بۇگىنگى تاڭدا رەسپۋبليكا بويىنشا 284 قۇرىلعى جۇمىس ىستەيدى. ولاردا بەينەباقىلاۋ كامەراسى بار. جالپى مۇنداي باتىرمالار قىلمىس دەڭگەيىن تومەندەتۋگە جانە قالا تۇرعىندارى مەن تۋريستەردىڭ ءومىر ءسۇرۋ ساپاسىن جاقسارتۋعا كومەكتەسەدى»، - دەدى ش. الەكەشيەۆ مينيسترلىك وتكىزگەن بريفينگتە.

ماسەلەن، اقپان ايىندا ەلوردالىق پوليتسياعا باتىرما ارقىلى «كوكتال» شاعىن اۋدانىنىڭ ساياباعىندا جوعالىپ كەتكەن 8 جاسار بالا قوڭىراۋ شالعان.

سونداي-اق مامىر ايىندا «كەرۋەن» ساۋدا-ويىن-ساۋىق ورتالىعى جانىنداعى باتىرمانىڭ كومەگىمەن جوعالعان 6 جاسار قىز پوليتسياعا حابارلاسقان. تەك 1-ماۋسىمدا استانادا «SOS» باتىرمالارى ارقىلى پوليتسياعا جۇگىنۋدىڭ 4 فاكتىسى تىركەلگەن.

«بۇگىنگى تاڭدا ەلىمىز بويىنشا 1,3 ميلليون بەينەباقىلاۋ كامەراسى جۇمىس ىستەيدى، ونىڭ ىشىندە 291 مىڭ كامەرا پوليتسيانىڭ جەدەل باسقارۋ ورتالىقتارىنا جانە كەزەكشى بولىمدەرىنە قوسىلعان. ولاردىڭ كومەگىمەن جىل باسىنان بەرى 5 مىڭنان استام قىلمىس جانە 324 مىڭ اكىمشىلىك قۇقىق بۇزۋشىلىق انىقتالدى»، - دەدى شىڭعىس الەكەشيەۆ.

ايتا كەتۋ كەرەك، ىشكى ىستەر مينيسترلىگى قارجى ينستيتۋتتارىمەن جانە جەكە كومپانيالارمەن بىرلەسىپ، بيۋدجەتتەن قاراجات كەتىرمەي، تۇيمەلەردى ورناتۋدىڭ وڭ تاجىريبەسىن ەنگىزدى. وسى تاسىلمەن 38 قۇرىلعى ورناتىلعان.