ەلىمىزدە مەيىرگەرلەردىڭ ەڭبەك جاعدايلارى جاقسارادى
استانا. KAZINFORM - مەديتسينالىق كوللەدجدەر كۇتىم جاساۋ بويىنشا كىشى مەيىرگەرلەردى، كۇتۋشىلەردى جانە باسقا دا پاتسيەنتتەرگە كۇتىم جاساۋ ماماندىقتارىن دايارلاۋدى قامتاماسىز ەتەدى.

ق ر دەنساۋلىق ساقتاۋ مينيسترلىگى جۇمىسشى ماماندىقتار جىلى حالىقارالىق ەڭبەك ۇيىمىنىڭ (ح ە ۇ) حالىقارالىق تالاپتارىنا سايكەس مەيىرگەرلەردىڭ ەڭبەك جاعدايلارىن جاقسارتۋ بويىنشا قوسىمشا شارالارعا باستاماشىلىق جاسايدى.
بۇل باستامالار «مەيىرگەرلىك پەرسونالدىڭ جۇمىسپەن قامتىلۋى جانە ەڭبەك جاعدايلارى مەن ءومىرى تۋرالى» ح ە ۇ № 149 كونۆەنتسياسىن راتيفيكاتسيالاۋدى ىلگەرىلەتۋ شەڭبەرىندە قارالادى.

ق ر دەنساۋلىق ساقتاۋ ءمينيسترى اقمارال ءالنازاروۆا ق ر ەڭبەك جانە حالىقتى الەۋمەتتىك قورعاۋ ءمينيسترىنىڭ كەڭەسشىسى ءلاززات اقتايەۆامەن جانە دەنساۋلىق ساقتاۋ جانە قوعامدىق قىزمەت كورسەتۋ قىزمەتكەرلەرىنىڭ قازاقستاندىق سالالىق كاسىپوداعىنىڭ ءتوراعاسى باقىتجان تاجىبايمەن كەزدەسۋ بارىسىندا قۇجاتتى راتيفيكاتسيالاۋعا قاتىستى ءبىرقاتار ماسەلەلەردى جانە ورتا مەديتسينالىق پەرسونالدىڭ ەڭبەك جاعدايلارىن جاقسارتۋ تۇرىندە كۇتىلەتىن ناتيجەلەردى تالقىلادى.
كەزدەسۋگە قاتىسۋشىلار دەنساۋلىق ساقتاۋ مينيسترلىگىنىڭ باسشىسىن ح ە ۇ- نىڭ قازاقستان تاراپىنا ق ر-داعى ستراتيفيكاتتاۋدان كەيىنگى ءىس-قيمىلدارعا ساراپتامالىق قولداۋ كورسەتۋگە، ءارتۇرلى سەكتورلاردا مەيىرگەرلىك كۇتىمدى جانە مەيىرگەرلىك قىزمەت كورسەتۋدى جۇزەگە اسىراتىن ادامداردىڭ بارلىق ساناتتارى ءۇشىن «مەيىرگەرلىك پەرسونال» ۇعىمىن بىرىزدەندىرۋگە دايىن ەكەندىگى تۋرالى حاباردار ەتتى.
- ح ە ۇ N149 كونۆەنسياسى راتيفيكاتسيالانعاننان كەيىن ءبىلىم بەرۋ، الەۋمەتتىك قورعاۋ ۇيىمدارىنىڭ جانە باسقا دا سەكتورلاردىڭ مەيىرگەرلىك پەرسونالىنا دەنساۋلىق ساقتاۋ سەكتورىنداعىداي قۇقىقتار مەن مىندەتتەمەلەر بەرىلەتىن بولادى. مەديتسينالىق كوللەدجدەر كۇتىم جاساۋ بويىنشا كىشى مەيىرگەرلەردى، كۇتۋشىلەردى جانە باسقا دا پاتسيەنتتەرگە كۇتىم جاساۋ ماماندىقتارىن دايارلاۋدى قامتاماسىز ەتەدى. مەديتسينالىق ۇيىمداردا كىشى مەيىرگەرلەر ءۇشىن جۇمىس ورىندارى قۇرىلادى، ولارعا مەيىرگەرلەردىڭ كۇندەلىكتى فۋنكتسيالارىن جۇكتەمەنى ازايتۋ ءۇشىن تاپسىرۋعا بولادى. ۇيدە ەمدەلۋشىلەرگە كۇتىم جاساۋ بويىنشا مەديتسينالىق قىزمەتتەردىڭ قولجەتىمدىلىگى جاقسارادى، - دەلىنگەن حابارلامادا.
ح ە ۇ N149 كونۆەنسياسى راتيفيكاتسيالانعاننان كەيىن حالىقارالىق نورمالاردى ودان ءارى يمپلەمەنتاتسيالاۋ بويىنشا قوسىمشا سەرپىن بەرىلەتىن بولادى.