ەلىمىزدە ەمحاناعا تىركەلۋ قاعيدالارى جاڭارتىلدى

استانا. KAZINFORM - دەنساۋلىق ساقتاۋ ءمينيسترى 2025-جىلعى 12-مامىرداعى بۇيرىعىمەن العاشقى مەديتسينالىق-سانيتاريالىق كومەك كورسەتەتىن دەنساۋلىق ساقتاۋ ۇيىمدارىنا ازاماتتاردى تىركەۋ قاعيدالارىنا وزگەرىستەر ەنگىزىلدى.

نەگىزگى قاعيداتتار

- وتباسىلىق قىزمەت كورسەتۋ قاعيداتى؛

- مەديتسينالىق قىزمەتتەردىڭ اۋماقتىق قولجەتىمدىلىگى؛

- قولجەتىمدىلىك شەگىندە مەديتسينالىق ۇيىمدى ەركىن تاڭداۋ؛

- كورسەتىلەتىن كومەكتىڭ ساپاسىنا پاتسيەنتتەردىڭ قاناعاتتانۋشىلىعى؛

- مەنشىك تۇرىنە قاراماستان مەديتسينالىق ۇيىمدار اراسىنداعى تەڭ قۇقىقتىلىق پەن ادال باسەكەلەستىك؛

- ناۋقاستاردىڭ ورنالاسقان جەرىنە قاراماستان پروفيلاكتيكا، دياگنوستيكا جانە ەمدەۋ قىزمەتتەرىنىڭ قولجەتىمدىلىگى.

ماڭىزدى وزگەرىستەر

جاڭا قاعيدالارمەن بىرگە «بالانىڭ زاڭدى وكىلدەرى» ۇعىمى ەنگىزىلدى. ولارعا اتا-انا، اسىراپ الۋشىلار، قامقورشىلار، قورعانشىلار، پاترونات تاربيەشىلەرى جانە بالالاردىڭ قۇقىعىن قورعاۋدى جانە قامقورلىق جاساۋدى قامتاماسىز ەتەتىن وزگە دە تۇلعالار جاتادى.

تىركەلۋ پروتسەسى

قازاقستان رەسپۋبليكاسىنىڭ ازاماتتارى، قانداستار، بوسقىندار، شەتەلدىكتەر جانە ەلدە تۇراقتى تۇراتىن ازاماتتىعى جوق ادامدار مەملەكەتتىك كەپىلدەندىرىلگەن كولەم مەديتسينالىق كومەك جانە م ءا م س (مىندەتتى الەۋمەتتىك مەديتسينالىق ساقتاندىرۋ) اياسىندا مەديتسينالىق كومەك الۋ ءۇشىن العاشقى مەديتسينالىق-سانيتاريالىق كومەك ۇيىمدارىنا تىركەلە الادى.

تىركەلۋ پروتسەسى ج س ن (جەكە سايكەستەندىرۋ ءنومىرى) نەگىزىندە جۇزەگە اسىرىلادى جانە مىنالاردى قامتيدى:

- العاشقى مەديتسينالىق-سانيتاريالىق كومەك ۇيىمىن تاڭدايدى؛

- جاڭا ۇيىمعا تىركەلگەن كەزدە اۆتوماتتى تۇردە الدىڭعى ۇيىمنان شىعارىلادى.

بالالاردى تىركەۋ

- 5 جاسقا دەيىنگى بالالار پەرزەنتحانادان شىققاننان كەيىن ءۇش كۇن ىشىندە ناقتى تۇراتىن مەكەنجايى بويىنشا تىركەلەدى؛

- 6-14 جاس ارالىعىنداعى بالالار زاڭدى وكىلدەرىنىڭ تىركەلگەن مەكەنجايى بويىنشا نەمەسە ولاردىڭ ءوتىنىشى نەگىزىندە تىركەلەدى؛

- 18 جاستان اسقان ستۋدەنتتەر مەن مەدرەسەدە وقيتىندار ءوز بەتىنشە تىركەلەدى.

ەرەكشە ساناتتاعى ازاماتتار مەن جۇكتى ايەلدەر تۇرعىلىقتى جەرى بويىنشا تىركەلەدى. قازاقستاندا ۋاقىتشا تۇراتىن شەتەلدىكتەر مەن ازاماتتىعى جوق ادامدار ەرىكتى نەمەسە مىندەتتى مەديتسينالىق ساقتاندىرۋ شەڭبەرىندە مەديتسينالىق كومەك الا الادى.

تىركەلۋ تاسىلدەرى

العاشقى مەديتسينالىق-سانيتاريالىق كومەك ۇيىمىنا تىركەلۋ جەكە جۇگىنۋ نەمەسە ەلەكتروندىق ۇكىمەت پورتالى ارقىلى ىسكە اسىرىلادى.

تىركەۋ ءۇشىن قاجەتتى قۇجاتتار:

- جەكە كۋالىك نەمەسە ەلەكتروندىق قۇجات؛

- زەينەتكەر كۋالىگى (زەينەتكەرلەر ءۇشىن)؛

- بالالارعا قاتىستى تۇلعالار ءۇشىن قامقورشىلىقتى راستايتىن قۇجاتتار؛

- تىركەۋ جونىندەگى كوميسسيانىڭ حاتتاماسى (سوتتالعاندار ءۇشىن).

العاشقى مەديتسينالىق-سانيتاريالىق كومەك ۇيىمى ءوتىنىمدى ءبىر جۇمىس كۇنى ىشىندە قاراستىرۋى ءتيىس. ەلەكتروندىق ۇكىمەت پورتالى ارقىلى جۇگىنگەن جاعدايدا قىزمەت ءوتىنىش تۇسكەن كۇنى كورسەتىلەدى.

تىركەۋدەن شىعۋ ءتارتىبى

تۇرعىلىقتى جەرىن اۋىستىرعان كەزدە نەمەسە ازاماتتىڭ قالاۋى بويىنشا جاڭا ۇيىمعا تىركەلۋ كەزىندە الدىڭعى ۇيىمنان اۆتوماتتى تۇردە تىركەۋدەن شىعارۋ جۇزەگە اسىرىلادى.

- اتالعان وزگەرىستەر 2025-جىلعى 1-شىلدەدەن باستاپ كۇشىنە ەنەدى جانە تىركەلۋ قاعيداتتارى مەن مەديتسينالىق قىزمەت الۋعا قۇقىعى بار ازاماتتار ساناتىنا قاتىستى. بۇل وزگەرىستەر بارلىق ساناتتاعى ازامات ءۇشىن العاشقى مەديتسينالىق-سانيتاريالىق كومەكتىڭ قولجەتىمدىلىگى مەن ساپاسىن ارتتىرۋعا باعىتتالعان، - دەلىنگەن قۇجاتتا.

جىل باسىندا دەنساۋلىق ساقتاۋ ءمينيسترى اقمارال ءالنازاروۆا مەديتسينالىق قىزمەتتىڭ ساپاسى، سونىڭ ىشىندە ەمحانا ماسەلەسى شەشىمىنە قاتىستى پىكىر ايتقان ەدى.