ەلىمىزدە مۇگەدەك جانداردىڭ 58 پايىزى ەڭبەككە جارامدى

Инвалидность Мүгедектік
Фото: Адлет Беремкулов/ Kazinform

استانا. KAZINFORM - قازاقستاندا مۇگەدەك جانداردىڭ مۇددەسىن تولىققاندى قورعاۋعا قاتىستى ءبىرقاتار شەشىمىن تاپپاعان ماسەلە بار. بۇل تۋرالى ەڭبەك جانە حالىقتى الەۋمەتتىك قولداۋ ءمينيسترى سۆەتلانا جاقىپوۆا ءمالىم ەتتى.

«بۇگىندە ەلىمىزدە 725 مىڭنان استام مۇگەدەك جان بار، ونىڭ 58 پايىزى ەڭبەككە جارامدى، 26,9 پايىزى زەينەت جاسىندا جانە 15,1 پايىزى بالالار مەن جاس وسپىرىمدەر. ەرەكشە جانداردى الەۋمەتتىك وقشاۋلاۋ، كەمسىتۋشىلىك، ينفراقۇرىلىمنىڭ ءتيىستى دەڭگەيدە قولجەتىمسىزدىگى، ەڭبەك نارىعىنداعى تەڭ ەمەس مۇمكىندىكتەر، ارناۋلى الەۋمەتتىك قىزمەتتەردىڭ ساپاسىنىڭ تومەندىگى جانە باسقا دا ماسەلەلەر ءالى دە وزەكتى بولىپ وتىر. ولاردى شەشۋ ءۇشىن مەملەكەت جۇيەلى شارالاردى اتقارىپ جاتىر»، - دەدى سۆەتلانا جاقىپوۆا ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

سونداي-اق، مينيستر قازاقستاندا 2025-جىلعا دەيىن مۇگەدەكتىگى بار جانداردىڭ قۇقىعىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار ىسكە اسىرىلىپ جاتقانىن ەسكە سالدى.

«الەۋمەتتىك كودەكس شەڭبەرىندە مۇگەدەكتىگى بار جانداردى الەۋمەتتىك قورعاۋدىڭ كوپ دەڭگەيلى جۇيەسى ەنگىزىلدى. ونىڭ ىشىندە، مەملەكەتتىك كومەك جانە جاردەماقىلار مەن الەۋمەتتىك تولەمدەر، الەۋمەتتىك وڭالتۋ، ارناۋلى الەۋمەتتىك قىزمەتتەر، جۇمىسقا ورنالاستىرۋ تاعى سول سياقتى قولداۋ تۇرلەرى بار»، - دەيدى ۆەدومستۆو باسشىسى.

سوڭعى جاڭالىقتار