ەلىمىزدە ۇلتتىق سيفرلىق ينۆەستيسيالىق پلاتفورما ىسكە قوسىلادى

Government
فوتو: primeminister.kz

ق ر پرەمەر-ءمينيسترىنىڭ ءبىرىنشى ورىنباسارى رومان سكلياردىڭ توراعالىعىمەن وتكەن ينۆەستيسيالاردى تارتۋ جونىندەگى كەڭەستىڭ كەزەكتى وتىرىسىندا جاڭا اقپاراتتىق جۇيە تانىستىرىلدى، دەپ حابارلايدى Kazinform پرەمەر-ءمينيستردىڭ رەسمي اقپاراتتىق رەسۋرسىنا سىلتەمە جاساپ.

ۇلتتىق سيفرلىق ينۆەستيسيالىق پلاتفورما ينۆەستيسيالىق جوبالاردى كەشەندى سۇيەمەلدەۋ بويىنشا اقپاراتتىق جۇيە قۇرۋدى كوزدەيدى. بۇل بارلىق تاراپقا - كاسىپكەرلەرگە جانە مەملەكەتتىك ورگاندار، قارجى ينستيتۋتتارى مەن كۆازيمەملەكەتتىك سەكتور وكىلدەرىنە بىردەي پايدالى بولادى دەپ جوسپارلانعان.

سيفرلىق پلاتفورمانىڭ فۋنكتسيونالى بارلىق پروتسەستى، ونىڭ ىشىندە ينۆەستورلار ءۇشىن قازاقستاندا قولجەتىمدى مەملەكەتتىك قىزمەتتەردى تولىق قامتۋعا مۇمكىندىك بەرەدى.

ينۆەستيسيالاردى تارتۋ ماسەلەلەرىندە مەملەكەتتىك قىزمەتتەردى سيفرلاندىرۋ - ۇكىمەتتىڭ باسىم جانە وزەكتى مىندەتتەرىنىڭ ءبىرى. ۇلتتىق ينۆەستيسيالىق پلاتفورما ەڭ الدىمەن ينۆەستورلار ءۇشىن ازىرلەنىپ جاتقانى اتاپ ءوتىلدى. سوندىقتان ول بارلىق ۇسىنىلعان قولداۋ شارالارىن قامتۋى قاجەت جانە پايدالانۋشىلار ءۇشىن مۇمكىندىگىنشە ىڭعايلى بولۋى كەرەك.

ۇلتتىق ينۆەستيسيالىق پلاتفورما كوپتەگەن پروتسەستى جەڭىلدەتىپ قانا قويماي، ولاردىڭ اشىقتىعىن قامتاماسىز ەتەدى. بۇل ءوز كەزەگىندە قازاقستاننىڭ ينۆەستيسيالىق تارتىمدىلىعىن ايتارلىقتاي ارتتىرادى دەپ كۇتىلۋدە. وسىعان بايلانىستى مەملەكەتتىك ورگاندارعا پلاتفورمانى ىسكە قوسۋدى جەدەلدەتۋ جانە جۇيەگە ينۆەستيسيالىق جوبالار بويىنشا بارلىق دەرەكتى ەنگىزۋ تاپسىرىلدى.

ينۆەستيسيالاردى تارتۋ جونىندەگى كەڭەستىڭ وتىرىسىندا كولىك، لوگيستيكا، دەنساۋلىق ساقتاۋ جانە تۋريزم سالالارىندا ىسكە اسىرۋ جوسپارلانعان جوبالار دا قارالدى.

اتاپ ايتقاندا، كولىك سالاسىنىڭ ينۆەستيسيالىق الەۋەتى بويىنشا ءۇ ا ا ا ج جوباسىن ىسكە اسىرۋ مىسالىندا «كونتسەسسيا» مەحانيزمىن ودان ءارى دامىتۋ، سونداي-اق ازاماتتىق اۆياتسيا جانە تەمىرجول كولىگى سالاسىنداعى جوبالار پۋلىن بىرنەشە ەسە ۇلعايتۋ قاجەتتىگى اتاپ ءوتىلدى.

دەنساۋلىق ساقتاۋ سالاسى بويىنشا مەديتسينالىق جابدىقتار ءوندىرىسىن لوكاليزاتسيالاۋ، بيوتەحنولوگيالىق پرەپاراتتار ءوندىرىسىن كەڭەيتۋ جانە كلينيكالار سالۋ سىندى جەكەلەگەن ينۆەستيسيالىق جوبالار قارالىپ، تاپسىرمالار بەرىلدى.

ايماقتار بويىنشا ۇلىتاۋ وبلىسى اكىمدىگىنىڭ ينۆەستيسيالار تارتۋ جونىندەگى جۇمىسى قارالدى. بۇگىندە وڭىردە 19 ينۆەستيسيالىق جوبادان تۇراتىن پۋل قۇرىلعان، ونىڭ شەڭبەرىندە 1700 دەن استام جاڭا جۇمىس ورنىن اشۋ جوسپارلانىپ وتىر.

العا قويىلعان مىندەتتەرگە قول جەتكىزۋ ءۇشىن وڭىرگە ينۆەستيسيالار تارتۋ بويىنشا قاجەتتى شارالاردى قابىلداۋ كەرەك ەكەنى اتاپ ءوتىلدى. مەملەكەتتىك جانە جەرگىلىكتى اتقارۋشى ورگاندارعا اتالعان بارلىق پروبلەمالىق ماسەلەلەردى قىسقا مەرزىمدە شەشۋ تاپسىرىلدى.

سوڭعى جاڭالىقتار