ەلىمىزدە ەلەكتر ەنەرگياسى بويىنشا تاپشىلىق ارتا ما
استانا. KAZINFORM - ق ر ەنەرگەتيكا ۆيتسە- ءمينيسترى سۇڭعات ەسىمحانوۆ ەلىمىزدەگى ەلەكتر ەنەرگياسى بويىنشا تاپشىلىق تۋرالى سۇراققا جاۋاپ بەردى.
- ەلەكتر ەنەرگياسىنا قاتىستى تاپشىلىق 6 ميلليارد ك ۆت س دەڭگەيىندە بولمايدى. جاڭا ەنەرگيا قۋاتتارىن ىسكە قوستىق، سوندىقتان بيىلعى تاپشىلىق بىلتىرعا قاراعاندا تومەندەيدى دەپ ەسەپتەيمىز. نەگىزگى يمپورت رەسەيدەن كەلىپ جاتىر. ال وڭتۇستىكتەگى كورشى ەلدەر بەرە العان جاعدايدا عانا يمپورتتالادى. اتاپ ايتقاندا، تاپشىلىق كولەمى ارتپايدى، - دەدى س. ەسىمحانوۆ سەناتتا تىلشىلەر سۇراعىنا جاۋاپ بەرە وتىرىپ.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان ۇكىمەتى مەن رەسەي ۇكىمەتى اراسىنداعى ق ر مەن ر ف- تىڭ ءبىرتۇتاس ەنەرگەتيكالىق جۇيەلەرىنىڭ قاتار جۇمىس ىستەۋىن قامتاماسىز ەتۋ جونىندەگى شارالار تۋرالى كەلىسىمدى راتيفيكاتسيالاۋ تۋرالى» زاڭى ماقۇلداندى.
قۇجات اياسىندا رەسەي فەدەراتسياسىنان قازاقستاننىڭ ءبىرىڭعاي ەنەرگەتيكالىق جۇيەسىنە بەرۋگە جوسپارلانعان ەلەكتر ەنەرگياسىنىڭ كولەمدەرىن جىل سايىن كەلىسۋ ەسكەرىلگەن.
سەناتور سۇيىندىك الداشيەۆتىڭ سوزىنە قاراعاندا، 2024 -جىلدىڭ قورىتىندىسى بويىنشا ەلىمىزدە ەلەكتر ەنەرگياسىن تۇتىنۋ كولەمى ءوندىرۋ كورسەتكىشتەرىنەن اسىپ ءتۇستى. ناقتى ايتقاندا، ەلەكتر ەنەرگياسىنىڭ ءوندىرىسى 117,9 ميلليارد ك ۆ ت س، بۇل رەتتە تۇتىنۋ - 119,9 ميلليارد ك ۆ ت س قۇرادى. بىلتىر رەسەيدەن ەلەكتر ەنەرگياسىن يمپورتتاۋ كولەمى 3,1 ميلليارد ك ۆ ت س بولدى. ۋاكىلەتتى ورگاننىڭ بولجامىنا سايكەس، 2025 -جىلى ەلەكتر ەنەرگياسىنا تاپشىلىق 5,7 ميلليارد ك ۆ ت س قۇرايدى، بۇل 2024 -جىلعى كورسەتكىشتەن 46 پايىزعا ارتىق.
