ەلىمىزدە ەلەكتر جارىعىنىڭ شەكتى تاريفى وزگەرۋى مۇمكىن
استانا. KAZINFORM — قازاقستاندىق 36 ەلەكتر ەنەرگياسىن ءوندىرۋشى ۇيىم ەنەرگەتيكا مينيسترلىگىنە 2025-جىلعى 1-اقپاننان باستاپ ەلەكتر ەنەرگياسىن وندىرۋگە ارنالعان شەكتى تاريفتى تۇزەتۋگە قاتىستى ءوتىنىم بەردى.
ەلەكتر ەنەرگياسىن ءوندىرۋشى ۇيىمداردىڭ مالىمەتتەرى بويىنشا تاريفكە تۇزەتۋ ەنگىزۋدىڭ قاجەتتىلىگى كومپانيالاردىڭ شىعىندارىنىڭ وسۋىمەن بايلانىستى.
شىعىنداردىڭ ءوسۋىنىڭ نەگىزگى فاكتورلارى: وندىرىستىك پەرسونالدىڭ جالاقىسىن كوتەرۋ.
2024-جىلى ورتاشا جالاقى %18 عا ارتىپ، 425 مىڭ تەڭگەنى قۇرادى. بيىل تاعى %15-20 عا ءوسىرۋ جوسپارلانۋدا، وسىلايشا ورتاشا جالاقىنى 490 مىڭ تەڭگەگە دەيىن كوتەرۋ كۇتىلۋدە.
مينيسترلىكتەن حابارلاعانداي، ەنەرگەتيكا سەكتورى بىلىكتى كادرعا تاپشى. ەنەرگەتيكا كاسىپورىندارىندا شتات سانى شامامەن 57 مىڭ ادام بولعان كەزدە 4,5 مىڭ مامان جەتىسپەيدى. 2024-جىلعى 1-قاڭتارداعى جاعداي بويىنشا قىزمەتكەرلەردىڭ ناقتى سانى 52,5 مىڭ ادامدى قۇرادى. جالاقىنى كوتەرۋ سالاداعى مامانداردى تارتۋعا جانە ۇستاۋعا باعىتتالعان.
سونىمەن قاتار، وتىن ساتىپ الۋ جانە كومىر مەن گازدى تاسىمالداۋ شىعىندارى ارتتى. سونداي-اق، تاريفتى تۇزەتۋگە ىقپال ەتەتىن فاكتورلاردىڭ ءبىرى جوندەۋ ناۋقانىن جۇرگىزۋ جانە ەنەرگيا ءوندىرۋشى وبەكتىلەردىڭ، ونىڭ ىشىندە مەتالدىڭ قىمباتتاۋىنا بايلانىستى وبەكتىلەردىڭ تۇراقتى جۇمىسىن قامتاماسىز ەتۋ ءۇشىن قاجەتتى ماتەريالدار مەن جابدىقتاردى ساتىپ الۋ جانە تاسىمالداۋ قۇنىنىڭ ءوسۋى.
سونداي-اق، جاڭا ءۇش ەنەرگيا ءوندىرۋشى ۇيىم ەنەرگيا ءوندىرۋشى ۇيىمداردىڭ تىزىمىنە قوسىلۋ بويىنشا ءوتىنىم بەردى، ولار ءۇشىن شەكتى تاريفتەردى بەلگىلەۋ قاجەتتىگى بار.
— الدىن الا ەسەپتەۋلەر بويىنشا ءبىرىڭعاي ساتىپ الۋشى ءۇشىن ەلەكتر ەنەرگياسىنىڭ قۇنىنا تاريفتەردى تۇزەتۋدىڭ اسەرى كۆت/ساع ءۇشىن شامامەن 2 تەڭگەنى قۇرايتىنىن كورسەتەدى. قازىر ەنەرگيا ءوندىرۋشى ۇيىمداردىڭ وتىنىمدەرى قارالىپ جاتىر. بارلىق ۇسىنىس تۇتىنۋشىلاردىڭ مۇددەسى مەن سالانىڭ تۇراقتى دامۋ قاجەتتىلىگى اراسىنداعى تەپە- تەڭدىكتى قامتاماسىز ەتۋ ءۇشىن مۇقيات تالدانادى، — دەلىنگەن ەنەرگەتيكا ءمينيسترىنىڭ بۇيرىق جوباسىندا.
قۇجات جوباسى «اشىق نقا» پورتالىندا جاريالاندى جانە 22-قاڭتارعا دەيىن قوعامدىق تالقىلاۋعا ۇسىنىلىپ وتىر.
وتكەن جىلدىڭ اياعىندا ۇكىمەت باسشىسىنىڭ ورىنباسارى ەلىمىزدە ەلەكتر ەنەرگياسىنا تاريفتىڭ وسۋىنە پىكىر بىلدىرگەن ەدى.
