ەلىمىزدە كولىك جىلدامدىعىن تىم قاتتى اسىرعاندارعا جازا كۇشەيتىلمەك
استانا. KAZINFORM - ەلىمىزدە جىلدامدىقتى 60 ك م/ساعات جانە ودان جوعارى شامادا اسىرعاندارعا قاتىستى جازا كۇشەيتىلمەك. بۇل تۋرالى پارلامەنت ءماجىلىسىنىڭ جالپى وتىرىسىندا «جول ءجۇرىسى تۋرالى» زاڭىنا جەكەلەگەن كولىك قۇرالدارى تۇرلەرىنىڭ ءجۇرۋىن ۇيىمداستىرۋ جانە جول قاۋىپسىزدىگىن سيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ كەزىندە ءمالىم بولدى.
ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ قورىتىندىسىنا قاراعاندا، رۇقسات ەتىلگەن جىلدامدىقتى اسىراتىن ادامدار ءۇشىن اكىمشىلىك جاۋاپتىلىقتى بەلگىلەۋگە، سونداي-اق قايتالاما قۇقىق بۇزۋ دەرەكتەرى ءۇشىن قوسىمشا جاۋاپتىلىق شارالارىن ەنگىزۋ ەسكەرىلگەن.
اتاپ ايتقاندا، كولىك قۇرالدارىنىڭ جىلدامدىعىن رۇقسات ەتىلگەن جىلدامدىقتان 60 ك م/ساعات جانە ودان جوعارى شامادا اسىرعانى ءۇشىن 40 ا ە ك مولشەرىندە ايىپپۇل سالۋدى كوزدەيتىن نەعۇرلىم قاتاڭ جاۋاپتىلىق ەنگىزۋ ۇسىنىلعان.
بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا «جول ءجۇرىسى تۋرالى» زاڭىنا جەكەلەگەن كولىك قۇرالدارى تۇرلەرىنىڭ ءجۇرۋىن ۇيىمداستىرۋ جانە جول قاۋىپسىزدىگىن سيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
