ەلىمىزدە كەلەر جىلى «كەلەشەك» باعدارلاماسى ىسكە قوسىلادى

ەلىمىزدە كەلەر جىلى «كەلەشەك» باعدارلاماسى جۇمىس ىستەي باستايدى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ءمالىم ەتتى، دەپ حابارلايدى Kazinform.

«بۇگىندە «كەلەشەك» باعدارلاماسىنا زاڭنامالىق وزگەرىستەر ەنگىزىلىپ جاتىر. ءبىلىم تۋرالى، جيناقتاۋشى جۇيە جانە باسقا دا زاڭدارعا وزگەرىستەر ەنگىزۋ قاجەت. بانكتەر ءالى انىقتالعان جوق، ولار باعدارلامانىڭ سەرىكتەسى بولادى. جوعارى قارجىلىق تۇراقتىلىققا يە بانكتەر بولاتىنى تۇسىنىكتى.

سونىمەن قاتار قارجى نارىعىن رەتتەۋ جانە دامىتۋ اگەنتتىگى مەن ۇلتتىق بانكتىڭ ءوز تالاپتارى بولادى»، - دەدى ساياسات نۇربەك ۇكىمەت ۇيىندە وتكەن باسپا ءسوز ءماسليحاتىندا.

مينيستر 6-7 بانك اتالعان باعدارلاما سەرىكتەسى بولادى دەپ بولجاپ وتىر.

سونداي-اق، س. نۇربەك مەملەكەت باسشىسى قاسىم-جومارت توقايەۆ كەلەر جىلى 1- قىركۇيەكتە بالالارعا ارنالعان ارنايى جيناقتاۋ جۇيەسىن ەنگىزۋدى تاپسىرعانىن ايتتى.