ەلىمىزدە جىل سايىن 360 مىڭنان استام ءسابي دۇنيە ەسىگىن اشادى
استانا. KAZINFORM - بۇگىندە ەلىمىزدە جىل سايىن 360 مىڭنان استام ءسابي دۇنيە ەسىگىن اشادى، ولاردىڭ دەنساۋلىعىن ءومىرىنىڭ العاشقى ساتتەرىنەن باستاپ 4 مىڭننان استام پەدياتر، 1 مىڭنان استام نەوناتولوگ جانە جەرگىلىكتى پراكتيكا دارىگەرلەرى مۇقيات قاداعالاپ، باقىلاۋدا ۇستايدى.
قازاقستاندا ءاربىر بالا تۋعان ساتىنەن باستاپ مەديتسينالىق باقىلاۋعا الىنادى.
- 7 ميلليوننان استام بالا تەگىن مەديتسينالىق كومەككە قول جەتكىزسە، جىل سايىن 2 ميلليوننان استام بالا سكرينينگتەن وتەدى، 4,5 ميلليوننان استام بالا پروفيلاكتيكالىق قاراپ-تەكسەرۋمەن قامتىلادى، 1,5 ميلليوننان استام بالاعا يممۋنداۋ جۇرگىزىلەدى، - دەدى دەنساۋلىق ساقتاۋ ءمينيسترى.
مەكتەپ جاسىنداعى بالالارعا ەرەكشە نازار اۋدارىلادى.
- بۇگىندە ءاربىر مەكتەپ بەلگىلى ءبىر ەمحاناعا بەكىتىلگەن، وندا 6,5 مىڭنان استام مەديتسينالىق پۋنكت جۇمىس ىستەيدى. بۇل بالالاردىڭ دەنساۋلىعىنداعى ماسەلەلەردى دەر كەزىندە انىقتاپ، كومەك كورسەتىپ، اۋرۋلاردىڭ الدىن الۋعا مۇمكىندىك بەرەدى، - دەدى اقمارال ءالنازاروۆا.
وسى جىلدان باستاپ مەملەكەت باسشىسىنىڭ تاپسىرماسى بويىنشا قازاقستاندا مەكتەپتەگى تاماقتانۋدىڭ جاڭا ۇلتتىق ستاندارتى ەنگىزىلىپ جاتىر.
ول عىلىمي ۇسىنىمدار، ءوسىپ كەلە جاتقان ورگانيزمنىڭ قاجەتتىلىكتەرى مەن سالاۋاتتى ءومىر سالتى قاعيداتتارى نەگىزىندە ازىرلەنگەن.
ءبىز بالالار دەنساۋلىعى ينفراقۇرىلىمىن دامىتۋ، ەرتە دياگنوستيكانى كۇشەيتۋ، نەوناتالدىق كومەك، ونكوپەدياتريا، وڭالتۋ جانە
پاللياتيۆتىك قولداۋعا وزىق تەحنولوگيالاردى ەنگىزۋ جۇمىسىن جالعاستىرىپ كەلەمىز، - دەدى دەنساۋلىق ساقتاۋ ءمينيسترى اقمارال ءالنازاروۆا.
2025 -جىلدان باستاپ ەمحانالاردا ەرتە ارالاسۋ ورتالىقتارى اشىلادى، ولار كومەككە مۇقتاج بارلىق بالالاردى قولداۋمەن قامتاماسىز ەتۋ ءۇشىن جۇمىس ىستەيدى.
قازاقستان بالالاردىڭ ستوماتولوگيالىق دەنساۋلىعىنا ەرەكشە كوڭىل بولەدى.
- «بولاشاققا - ساۋ تىسپەن» باعدارلاماسى شەڭبەرىندە ەلىمىزدەگى بارلىق مەكتەبىندە مىندەتتى ستوماتولوگيالىق قاراپ-تەكسەرۋ مەن تىسجەگى دامۋىنىڭ الدىن الۋ شارالارى ەنگىزىلدى. مەن، پەدياتر- دارىگەر جانە مينيستر رەتىندە، بالانىڭ دەنساۋلىعى - بۇل ونىڭ تولىققاندى دامۋىنىڭ، ومىردەگى جەتىستىگىنىڭ جانە بۇكىل ۇلتتىڭ ءبىلىمى مەن كۇشىنىڭ نەگىزى ەكەنىن جاقسى بىلەمىن، - دەدى مينيستر.
ايتا كەتەلىك مەكتەپتەردە 1 مىڭنان استام ستوماتولوگيا كابينەتى اشىلاتىنى تۋرنالى جازعان ەدىك.
