ەلىمىزدە جۇمىس ءبىر ساعاتقا ەرتە باستالۋى مۇمكىن

Вақт
Фото: pexels.com

استانا. KAZINFORM - ەلىمىزدە ءبىرىڭعاي ۋاقىت بەلدەۋىنە كوشۋگە بايلانىستى جۇمىس ۋاقىتى وزگەرۋى مۇمكىن، ناقتى ايتقاندا ءبىر ساعاتقا ەرتە باستالماق.

ۇكىمەت وتىرىسىنان كەيىن ب ا ق وكىلدەرى ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆاعا كەلەسى سۇراقتى قويدى: «ەلىمىزدىڭ ءبىرقاتار وڭىرىندە ۋاقىت بەلدەۋىنىڭ اۋىسۋىنا بايلانىستى الەۋمەتتىك جەلىدە جۇمىس ۋاقىتىن ءبىر ساعاتقا ەرتە باستاۋعا قاتىستى ۇسىنىستار ءتۇسىپ جاتىر. ويتكەنى قىستىگۇنى قاراڭعى ەرتە تۇسەدى. وسى ۇسىنىسقا قالاي قارايسىز، ەڭبەك مينيسترلىگىنىڭ جوسپارى قانداي؟».

«بىزگە كوپ حات كەلىپ جاتىر، ءبىز ولارعا جاۋاپ بەرەمىز. جۇمىس بەرۋشى مەن جۇمىسشىنىڭ اراسىندا كەلىسىمشارت بار، جۇمىس كەستەسىن ەكى جاق بىرگە جاسايدى. سوندىقتان قاراڭعىدا جۇمىس ىستەمەۋى ءۇشىن، جۇمىس بەرۋشىمەن كەلىسىپ، جۇمىس كەستەسىن قايتا قاراي الادى. نەگىزى بۇل كۇردەلى سۇراق ەمەس»، - دەدى دەپ جاۋاپ بەردى سۆەتلانا جاقىپوۆا.

سونداي-اق، مينيستر جەكە جانە بيۋجەتتىك مەكەمەلەرگە ۇسىنىس بەرىلگەنىن ايتتى.

«ۇسىنىس بەردىك، ياعني جۇمىس ءبىر ساعاتقا ەرتە باستالۋى مۇمكىن. نەگىزى كەلىسىمشارت ەكىجاقتى جاسالادى. ول ەڭبەك كودەكسىندە جازىلعان، زاڭعا سايكەس»، - دەپ تولىقتىردى ۆەدومستۆو باسشىسى.

ەسكە سالا كەتەيىك، بيىل 10-ماۋسىمدا ۋاقىت بەلدەۋىنە قاتىستى پەتيتسيا قاراۋعا قابىلداندى.

سوڭعى جاڭالىقتار