ەلىمىزدە جاس عالىمدارعا جاعداي جاسالا باستادى

قازاقستان جاس عالىمدار ءۇشىن بارىنشا قولايلى ورتا قالىپتاستىرۋعا ۇمتىلۋدا. عالىمدارعا قولداۋ كورسەتۋ قاجەتتىگى جانە ەلىمىزدە عىلىمي كادرلاردىڭ تاپشىلىعى كوپتەن بەرى جانە جۇيەلى تۇردە ايتىلىپ كەلەدى. Kazinform بۇل تۋرالى Energyprom مونيتورينگ رەسۋرسىنا سىلتەمە جاساپ حابارلايدى.

ماسەلەن، ق ر عىلىم جانە جوعارى ءبىلىم ءمينيسترى ساياسات نۇربەك 90-جىلداردىڭ قيىن- قىستاۋ كەزەڭىندە قازاقستاننىڭ 30 مىڭنان استام عالىمنان ايرىلۋى - ەلىمىزدىڭ عىلىمي الەۋەتىنە اۋىر سوققى بولعانىن ايتادى.

جاس عالىمداردى قولداۋ، ولاردى ەل ىشىندە قالدىرۋ ماقساتىندا ءتۇرلى شارالار اتقارىلىپ جاتىر. سونىمەن، ق ر پارلامەنتى ءماجىلىسىنىڭ دەپۋتاتى اسحات ايماعامبەتوۆ جاڭارتىلعان زاڭ جوبالارىنىڭ ارقاسىندا قازاقستاندىق عالىمدار ۇزدىكسىز، تۇراقتى جالاقى الىپ، گرانتقا تاۋەلدى بولمايتىنىن ايتتى.

سونىمەن قاتار، «وتباسى بانكى» ارقىلى جاس عالىمداردى باسپانامەن قامتاماسىز ەتەتىن ماڭىزدى باعدارلاما - جەڭىلدىكپەن نەسيەلەندىرۋ قولعا الىندى.

الەۋەتتى قارىز الۋشىلاردىڭ تىزىمىندە عىلىم جانە جوعارى ءبىلىم مينيسترلىگىنە قاراستى 53 ۇيىمنىڭ جاس عالىمدارى بار.

باعدارلاما جاس عالىمدارعا العاشقى پاتەرىن ساتىپ الۋعا جانە سايكەسىنشە تۋعان ەلىنىڭ يگىلىگى ءۇشىن عىلىمي زەرتتەۋدى جالعاستىرىپ، قازاقستاندا قالۋعا مۇمكىندىك بەرەدى.

باعدارلاما بويىنشا نەسيەنىڭ ماكسيمالدى سوماسى - 20 ميلليون تەڭگە، نەسيە مەرزىمى - 19 جىلعا دەيىن، مولشەرلەمەسى - بار بولعانى جىلىنا %5 (ج ت پ م — %5,2 دان باستاپ).

جاس عالىمدار ەڭ كوپ دەگەندە 20 ميلليون تەڭگە نەسيە السا، العاشقى سەگىز جىلدا اي سايىنعى تولەم مولشەرى - 155 مىڭ تەڭگە، ودان كەيىنگى جىلدارى 84 مىڭ تەڭگەگە دەيىن تومەندەيدى.

وسىلايشا وتباسى بانكى مەن ءتيىستى مينيسترلىك عىلىممەن جانە زەرتتەۋمەن اينالىساتىن جاستاردىڭ ءومىرىن جايلى ەتىپ، قازاقستاننىڭ اكادەميالىق ورتاسىن جاقسارتۋعا ىقپال ەتىپ وتىر.

باعدارلاما 1-جەلتوقساننان باستاپ ىسكە قوسىلدى.

العاشقى ايدا 16 عالىم 311 ميلليون 415 مىڭ تەڭگە نەسيە الىپ ۇلگەردى.