ەلىمىزدە جارتى ميلليونعا جۋىق ادام زياندى ەڭبەك جاعدايىندا جۇمىس ىستەپ ءجۇر

استانا. KAZINFORM - ۇلتتىق ستاتبيۋرو 2023 -جىلعى زياندى جانە وزگە دە قولايسىز ەڭبەك جاعدايىندا جۇمىس ىستەيتىن قىزمەتكەرلەردىڭ سانىن جاريالادى.

وتكەن جىلى 410,3 مىڭ ادام (2022 -جىلى - 386,3 مىڭ ادام) نەمەسە زەرتتەلگەن كاسىپورىن قىزمەركەرلەرىنىڭ جالپى سانىنان %24,2 سانيتارلىق-گيگيەنالىق تالاپتارعا ساي كەلمەيتىن جاعدايدا جۇمىس ىستەگەن.

كاسىپورىن قىزمەتكەرلەرى اراسىندا سانيتارلىق- گيگيەنالىق تالاپتارعا ساي كەلمەيتىن جاعدايدا جۇمىسپەن قامتىلعانداردىڭ ەڭ ۇلكەن ۇلەسى قاراعاندى - %45,1، ماڭعىستاۋ - %43,6، پاۆلودار - %42,2، ۇلىتاۋ - %40,2، شىعىس قازاقستان وبلىستارىندا - %32,5.

ونداي قىزمەتكەرلەردىڭ ەڭ از ۇلەسى - قىزىلوردا وبلىسىندا (%8,8).

2023 -جىلى كاسىپورىندار (ۇيىمدار) زياندى جانە باسقا دا قولايسىز ەڭبەك جاعدايىندا جۇمىس ىستەگەنى ءۇشىن وتەماقى مەن جەڭىلدىكتەرگە 255182600  تەڭگە جۇمسادى.

قوسىمشا دەمالىس 543,5 مىڭ ادامعا بەرىلگەن، زياندى جانە باسقا دا قولايسىز ەڭبەك جاعدايلارى ءۇشىن 419,4 مىڭ ادام قوسىمشا اقى العان.