ەلىمىزدە جانار-جاعارماي باعاسى قاشان قىمباتتاۋى مۇمكىن
الماتى. KAZINFORM -الماتىدا حالىقارالىق KIOGE كونفەرەنسياسى ءوتتى. ءىس-شاراعا قاتىسقان ق ر ەنەرگەتيكا ءمينيسترى الماسادام ساتقاليەۆ قازاقستاندا الداعى ۋاقىتتا جانار-جاعارماي باعاسىنىڭ كۇرت وسپەيتىنىن ايتتى.
ۆەدومستۆو باسشىسىنىڭ ايتۋىنشا، قازىرگى ۋاقىتتا بەنزين قورى شامامەن 22 كۇنگە، ال ديزەل وتىنى 35 كۇنگە جەتەدى. ول جانار-جاعارماي قورى اۋىل شارۋاشىلىعىنداعى ەگىن جيناۋ ناۋقانى مەن اتىراۋ مۇناي وڭدەۋ زاۋىتىندا جوسپارلانعان جوندەۋ جۇمىستارىن ەسكەرە وتىرىپ قالىپتاسقانىن اتاپ ءوتتى.
- ءبىز شەكارا ارقىلى ونىمدەرىمىزدىڭ زاڭسىز ءوتۋ ءۇردىسىنىڭ ۇدەپ بارا جاتقانىن بايقاپ وتىرمىز. ىشكى نارىق پەن كورشى مەملەكەتتەردىڭ باعالارى اراسىندا ايتارلىقتاي ايىرماشىلىق بار. ءبىز ىشكى نارىقتى تۇراقتى قامتاماسىز ەتۋگە تەرىس اسەر ەتۋى مۇمكىن بۇل تاۋەكەلدى كورىپ وتىرمىز، - دەدى مينيستر.
سونداي-اق مينيستر جانار-جاعارماي باعاسىن كۇرت ءوسىرۋ جوسپاردا جوق ەكەنىن ايتتى. ويتكەنى ۇكىمەت الەۋمەتتىك جاۋاپتى ءتاسىلدى ۇستانادى. الايدا ول باعانىڭ جوسپارلى ءوسۋى كۇتىلەتىنىن جوققا شىعارمادى.
- ءبىرىنشى كەزەكتە حالىقتىڭ الەۋمەتتىك وسال توپتارى ءۇشىن گاز جانە مۇناي ونىمدەرىمەن قامتاماسىز ەتۋگە بايلانىستى باستاپقى قاجەتتىلىكتەردى قوسا العاندا، كوممۋنالدىق قىزمەتتەر باعاسىنىڭ ءوسۋىن وتەۋگە مۇمكىندىك بەرەتىن اتاۋلى الەۋمەتتىك كومەك (ا ا ك) جانە الەۋمەتتىك ءاميان باعدارلامالارىن ىسكە قوسۋ جوسپارلانىپ وتىر. وسى تەتىك ازىرلەنگەننەن كەيىن باعانىڭ ءوسۋى ۇكىمەتتىڭ باعدارلاماسىنا سايكەس، ءبىز ۇلتتىق بانك پەن ۇكىمەت بەلگىلەگەن ينفلياتسيا دالىزىنە باعدارلاناتىن ينديكاتورلارعا سايكەس بىركەلكى جۇزەگە اسىرىلاتىن بولادى،- دەدى الماسادام ساتقاليەۆ.
