ەلىمىزدە شاعىن جيناقتى مەكتەپتەر سانى قانشا

استانا. KAZINFORM - وقۋ-اعارتۋ مينيسترلىگى شاعىن جيناقتى مەكتەپتەردىڭ جۇمىسىنا كەپىلدىك بەرەتىن نورماتيۆكە تۇسىنىك بەردى.

- مينيسترلىكتىڭ 2022 -جىلعى 6-مامىرداعى  185-بۇيرىعىمەن بەكىتىلگەن حالىقتىڭ تىعىزدىعىنا جانە ەلدى مەكەندەردىڭ قاشىقتىعىنا قاراي ءبىلىم بەرۋ ۇيىمدارى جەلىسىنىڭ كەپىلدىك بەرىلگەن مەملەكەتتىك نورماتيۆىنە سايكەس، حالىق سانى از ءاربىر ەلدى مەكەندە: باستاۋىش - ءبىلىم الاتىندار سانى 5 تەن 40 بالاعا دەيىن، نەگىزگى - 41 دەن 80 بالاعا دەيىن، ورتا - 81 دەن 180 بالاعا دەيىن جۇمىس ىستەۋىنە كەپىلدىك بەرىلەدى. جالپى، ەلىمىز بويىنشا 8 مىڭعا جۋىق مەكتەپتىڭ ىشىندە ەكى مىڭنان استام مەكتەپ اۋىلدا ورنالاسقان شاعىن جيناقتى مەكتەپتەر سانالادى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

بۇل رەتتە، حالىقتىڭ كوشى-قونىنا بايلانىستى اۋىل مەكتەبىنىڭ جەلىسى مەن كونتينگەنتى جىل بويى وزگەرىپ وتىرادى.

- سونىمەن قاتار، «ءبىلىم تۋرالى» زاڭنىڭ 6-بابىنا سايكەس، قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن مەملەكەتتىك ءبىلىم بەرۋ ۇيىمدارىن قۇرۋ، قايتا ۇيىمداستىرۋ جانە تاراتۋ جەرگىلىكتى اتقارۋشى ورگانداردىڭ قۇزىرەتىنە جاتادى، - دەپ اتالىپ وتكەن ۆەدومستۆو اقپاراتىندا.

وسىعان دەيىن شاعىن جيناقتى مەكتەپتەردىڭ ەڭ كوبى سولتۇستىك قازاقستان، قوستاناي، اقمولا، پاۆلودار، باتىس قازاقستان جانە اقتوبە وبلىستارىندا ورنالاسقانىن جازعان ەدىك.
ايتا كەتەيىك، 2024 -جىلى ەلىمىزدە 373 مىڭ وقۋشى ورنىنا ارنالعان 257 مەكتەپ سالىندى. بيىل 300 مىڭ ورىندىققا ارنالعان 200 گە جۋىق مەكتەپتىڭ قۇرىلىسى جۇرەدى.