ەلىمىزدە ءۇي جانۋارلارىنىڭ سيفرلىق پاسپورتى ازىرلەندى

استانا. KAZINFORM - ەندى ءۇي جانۋارلارىنىڭ سيفرلىق پاسپورتتارى eGov Mobile قوسىمشاسىندا قولجەتىمدى. جاڭا قىزمەت تۋرالى تولىعىراق «ۇلتتىق اقپاراتتىق تەحنولوگيالار» ا ق حابارلاماسىندا ايتىلعان.

- ءيت، مىسىق جانە باسقا دا ءۇي جانۋارلارىنىڭ يەلەرى ولاردىڭ مالىمەتتەرىن eGov Mobile موبيلدى قوسىمشاسىنىڭ «سيفرلىق قۇجاتتار» بولىمىنەن قاراي الادى. بارلىق مالىمەت TABAN - ءۇي جانۋارلارىن ەسەپكە الۋ ءبىرىڭعاي دەرەكتەر بازاسىنان جۇكتەلەدى. بۇل جۇيەدە تىركەلگەن بارلىق ءۇي جانۋارى جانە ولارعا قاتىستى ماڭىزدى وقيعالار جازىلىپ وتىرادى. سيفرلىق پاسپورتتا كەلەسى مالىمەتتەر قامتىلادى، جانۋاردىڭ جەكە ءنومىرى، قۇجات ءنومىرى، اتى، ءتۇسى، تۇقىمى، تۋعان كۇنى، ەرەكشە بەلگىلەرى، جانۋاردىڭ ءتۇرى مەن جىنىسى، تىركەلگەن مەكەنجايى، ناقتى تۇراتىن مەكەنجايى، يەسىنىڭ تولىق اتى-ءجونى مەن ج س ن، سونداي-اق چيپتەۋ، ستەريلدەۋ جانە ۆاتسيناتسيا تۋرالى اقپارات مەرزىمى مەن مارتەبەسى كورسەتىلگەن، - دەلىنگەن حابارلامادا.

قىزمەتتى پايدالانۋ ءۇشىن:

eGov Mobile قوسىمشاسىنا اۆتوريزاتسيادان ءوتىپ؛

«سيفرلىق قۇجاتتار» سەرۆيسىنە كىرۋ قاجەت؛

«باسقا قۇجاتتار» بولىمىندە جانۋار پاسپورتىمەن تانىسۋ كەرەك؛

ەگەر قۇجات كورىنبەسە، «قۇجاتتاردى جاڭارتۋ» باتىرماسىن باسۋ قاجەت.

- سيفرلىق ءتولقۇجات ۆەتەرينارلىق كلينيكاعا بارعاندا، ساياحاتقا شىعاردا، كورمەلەرگە قاتىسقاندا نەمەسە جانۋار جوعالعان جاعدايدا ونىڭ دەرەكتەرىن جەدەل ۇسىنۋعا مۇمكىندىك بەرەدى. سونىمەن قاتار بۇل قىزمەت ءۇي جانۋارلارىن جۇيەلى تۇردە ەسەپكە الۋعا، قاڭعىباس جانۋارلار سانىن ازايتۋعا جانە يەلەرىنىڭ جاۋاپكەرشىلىگىن ارتتىرۋعا سەپتىگىن تيگىزەدى، - دەيدى ۇلتتىق اقپاراتتىق ورتالىعىنان.

بيىل ناۋرىزداعى جاعداي بويىنشا جۇيەدە 224 مىڭنان استام ءۇي جانۋارى تىركەلگەن، ونىڭ ىشىندە 20 مىڭنان استامى يەسىز جانۋارلار.

ايتا كەتەيىك، بۇگىندە اسكەري وقۋ ورىندارى eGov.kz پورتالى ارقىلى ءوتىنىم قابىلدايدى.

سونداي-اق eGov Mobile ارقىلى قازاقستاندىقتار جەكە دەرەكتەرىنىڭ تارالۋ جاعدايىن تەكسەرە الادى.

ودان بولەك eGov پورتالىنىڭ كومەگىمەن زاڭسىز تىركەلگەن SIM- كارتانى انىقتاۋ مۇمكىندىگى بار.