ەلىمىزدە ءتيىمدى كوللەدجدەردىڭ ەكوجۇيەسى قۇرىلادى

استانا. KAZINFORM - وقۋ-اعارتۋ ءمينيسترى عاني بەيسەمبايەۆ ۇكىمەت وتىرىسىندا «جۇمىسشى ماماندىقتار» جىلىندا كاسىپتىك- تەحنيكالىق ءبىلىم بەرۋ جۇيەسى قالاي رەفورمالاناتىنىن ايتتى.

- بىزگە تەحنيكالىق ءبىلىم جۇيەسىنىڭ رەفورماسى قاجەت. وسى باعىتتا قانداي جۇمىس اتقارىلىپ جاتىر، - دەپ سۇرادى پرەمەر-مينيستر ولجاس بەكتەنوۆ.

مينيستر عاني بەيسەمبايەۆ بۇل باعىتتا ارنايى جول كارتاسى بەكىتىلگەنىن ءمالىم ەتتى.

- جالپى وسى «جۇمىسشى ماماندىقتار» جىلى اياسىندا كاسىپتىك- تەحنيكالىق ءبىلىمدى ترانسفورماتسيالاۋعا باسىمدىق بەرىلەدى. بۇل باعىتتا مينيسترلىك مۇددەلى مەملەكەتتىك ورگاندارمەن بىرگە كادر دايارلاۋدىڭ ساپاسىن ارتتىرۋ، سيفرلىق تەحنولوگيالاردى جانە حالىقارالىق ستاندارتتاردى ىڭعايلاستىرۋ جانە جالپى كوللەدج، بيزنەس، ج و و-لاردىڭ ىنتىماقتاستىعىن كۇشەيتۋ باعىتىندا جول كارتاسىن بەكىتىپ وتىر. بۇل جول كارتاسى ءتيىمدى كوللەدجدەردىڭ ەكوجۇيەسىن قۇرۋعا ناتيجەلى كومەك بەرەدى دەگەن ءۇمىت بار، - دەدى ۆەدومستۆو باسشىسى.

ەسكە سالساق، بۇعان دەيىن جەكەمەنشىك جانە مەملەكەتتىك كوللەدج پەداگوگتەرىنىڭ جالاقىسى تەڭەستىرىلەتىنىن جازدىق.

سونىمەن قاتار، پرەزيدەنت جارلىعىمەن 2025 -جىل «جۇمىسشى ماماندىقتارىنىڭ» جىلى دەپ جاريالانعان ەدى.