ەلىمىزدە ءتورت ايدا 30 مىڭعا جۋىق وتباسىلىق زورلىق-زومبىلىق فاكتىسى تىركەلگەن
استانا. KAZINFORM - بيىل قاڭتار-ءساۋىر ايلارى ارالىعىندا وتباسىلىق زورلىق-زومبىلىق تۋرالى كەيبىر فاكتىلەردى پوليتسيا قىزمەتكەرلەرى وزدەرى انىقتاعان.

ىشكى ىستەر مينيسترلىگىنىڭ رەسمي اقپاراتىنا سۇيەنسەك، 2024 -جىلدىڭ 4 ايىندا تۇرمىستىق زورلىق-زومبىلىق فاكتىلەرى بويىنشا 28189 شاعىم تۇسكەن، ال بىلتىر بۇل كورسەتكىش 35202 بولعان. زورلىق كورسەتكەن 44,4 مىڭ ادام اكىمشىلىك جاۋاپكەرشىلىككە تارتىلىپ، ونىڭ ىشىندە 11026 مىڭ ادام قاماۋعا الىندى.
«وتكەن جىلى ءجابىر كورۋشىلەردىڭ ارىزدانۋدان باس تارتۋىنا بايلانىستى 60 پايىزدان استام قۇقىق بۇزۋشى جازادان جالتارسا، بيىل تىركەلگەن فاكتىلەر بويىنا ايىپتىلاردىڭ 98 پايىزىنا شارا قابىلداندى»، - دەلىنگەن ىشكى ىستەر مينيسترلىگىنىڭ Kazinform اگەنتتىگى جولداعان رەسمي ساۋال جاۋابىندا.
ودان بولەك، پوليتسيا قىزمەتكەرلەرى «اگرەسسورلارعا» قاتىستى 34 مىڭ قورعاۋ نۇسقاماسىن شىعارعان. سونىمەن قاتار سوت ىشكى ىستەر ورگاندارىنىڭ ءوتىنىشحاتى بويىنشا قۇقىق بۇزۋشىلاردىڭ مىنەز-قۇلقىنا 4 مىڭنان استام ەرەكشە تالاپتار بەلگىلەگەن.
«قابىلدانعان ۇيىمداستىرۋ جانە قۇقىقتىق شارالاردىڭ ناتيجەسىندە بيىل 4 ايدىڭ قورىتىندىسى بويىنشا تۇرمىستىق زورلىق-زومبىلىق فاكتىلەرى نەگىزىندە شاعىمداردىڭ سانى 20 پايىزعا، وتباسىلىق-تۇرمىستىق قاتىناستار سالاسىنداعى قىلمىستىق قۇقىق بۇزۋشىلىقتار 5 پايىزعا، ونىڭ ىشىندە كىسى ءولتىرۋ 2,4 پايىزعا جانە اۋىر دەنە جاراقاتىن كەلتىرۋ 6,8 پايىزعا ازايدى»، - دەيدى ۆەدومستۆودان.
ايتا كەتەيىك، وتكەن جىلى ىشكى ىستەر ورگاندارىنا وتباسىندا زورلىق-زومبىلىق كورۋ بويىنشا 99026 فاكتى تىركەلگەن.
سونداي-اق، ىشكى ىستەر مينيسترلىگى وتباسىنىڭ شىرقىن بۇزىپ، قاماۋعا الىنعانداردىڭ سانى ارتقانىن ايتىپ وتىر.
اۆتور
داۋلەت ىزتىلەۋ