ەلىمىزدە بىردە-ءبىر ۇيىم مۇگەدەكتى جۇمىسقا العىسى كەلمەيدى - دەپۋتات

Депутат Таңсәуле Серіков
Фото: Фото: ҚР Ғылым және жоғары білім министрлігі

ءماجىلىس دەپۋتاتى تاڭساۋلە سەرىكوۆ پرەمەر-مينيستر ءاليحان سمايىلوۆقا ساۋال جولداپ، مۇگەدەك جانداردى جۇمىسقا ورنالاستىرۋ ماسەلەسىن كوتەردى، دەپ حابارلايدى Kazinform.

«ەل پرەزيدەنتى قاسىم-جومارت توقايەۆ ءوزىنىڭ ءار جولداۋىندا مۇگەدەكتىگى بار جانداردى قورعاۋ، ولارعا دەگەن كومەكتى ۇلعايتۋ كەرەكتىگىن ءاردايىم ايتۋدا جانە ناقتى تاپسىرۋدا. بۇل ۇكىمەتكە عانا ەمەس، ءار مەكەمە باسشىلارىنا دا قاتىستى. 2015-جىلدان بەرى مۇگەدەكتىگى بار تۇلعالاردى جۇمىسپەن قامتۋ تۋرالى زاڭ قابىلداندى. ناقتى تاپسىرما بەرىلدى. 2016-جىلى ءار مەكەمەگە كۆوتا ەنگىزىلدى. كۆوتا مولشەرى 2 پايىزدان 4 پايىزعا دەيىن كورسەتىلگەن. الەمدىك كورسەتكىش - 6 پايىز. 2023-جىلى الەۋمەتتىك كودەكس كۇشىنە ەندى. وسى جىلدىڭ 7 ماۋسىمدا ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعىمەن مۇگەدەك ادامدار ءۇشىن جۇمىس ورىندارىن كۆوتالاۋ ەرەجەسى بەكىتىلدى. بەكىتىلگەن ەرەجەدە، تاپسىرمادا سول كۇيىندە قالدى»، - دەدى ول.

ونىڭ اتاپ وتۋىنشە، بىردە-ءبىر ۇيىم مۇگەدەكتى جۇمىسقا العىسى كەلمەيدى. مۇگەدەكتى مۇسىركەيدى. ال ەندى كوپ مەكەمە وزدەرىندە مۇگەدەك جاننىڭ جۇمىس ىستەپ جۇرگەنىن بىلمەيدى دە.

«سەبەبى ولار ءوزىنىڭ مۇگەدەك ەكەنىن ايتقىسى كەلمەيدى. ويتكەنى جۇمىستان ايىرىلىپ قالۋدان قورقادى. وكىنىشكە قاراي، كۇننەن كۇنگە مۇگەدەكتىگى بار جاندار سانى ارتىپ كەلەدى. سوندىقتان ولار ەرتەڭگى كۇنىنە سەنىمدى بولۋلارى ءۇشىن ءبىز ولارعا كومەكتەسىپ، جۇمىس ورىندارىن ۇيىمداستىرا ءبىلۋىمىز كەرەك. پرەزيدەنتتىڭ تاپسىرماسى مىندەتتى تۇردە ورىندالۋى ءتيىس جانە ونى ۇكىمەت قاداعالاۋى كەرەك»، - دەدى ءماجىلىس دەپۋتاتى.

وسى ورايدا تاڭساۋلە سەرىكوۆ ۇكىمەت باسشىسىنا مىناداي ۇسىنىستارىن جەتكىزدى.

  1. مۇگەدەكتىگى بار جاندار ءۇشىن جۇمىس ورىندارى مىندەتتى تۇردە ۇيىمداستىرىلىپ، قاتاڭ تۇردە قاداعالانۋى كەرەك.
  2. ونى ورىنداماعان ۇيىمدارعا ۇلكەن مولشەردە ايىپپۇل سالىنۋى قاجەت. سول ايىپپۇلدان تۇسكەن قارجىعا مۇگەدەكتىگى بار تۇلعالارعا جۇمىس ورىندارى ۇيىمداستىرىلعانى ءجون.
  3. وقۋ اعارتۋ مينيسترلىگىنە، عىلىم جانە جوعارى ءبىلىم مينيسترلىگىنە مۇگەدەكتىگى بار جاندار ءۇشىن جوعارى وقۋ ورىندارىندا، كوللەدجدەردە ساپالى ماماندار دايارلايتىن، قايتا دايارلايتىن وقۋ ورىندارى ۇيىمداستىرۋى ءتيىس. وقۋ ورىندارىن ءتامامداعان مۇگەدەكتىگى بار جاندار مەملەكەتتىك، كۆازيمەملەكەتتىك ۇيىمداردا 100 پايىز جۇمىسقا ورنالاستىرىلۋى كەرەك.
سوڭعى جاڭالىقتار