ەلىمىزدە بيۋجەتتى جوسپارلاۋدا جاساندى ينتەللەكت قولدانىلماق

استانا. KAZINFORM - كەلەسى جىلى مەملەكەتتىك بيۋدجەتتى جوسپارلاۋ اياسىندا جاساندى ينتەللەكتىنى قولدانۋ جوسپارلانىپ وتىر.

بۇگىن ۇكىمەت وتىرىسىندا كۇندەلىكتى ومىردە جاساندى ينتەللەكتىنى ەنگىزۋ ماسەلەسى قوزعالدى. وسى ورايدا باق وكىلدەرى قارجى ۆيتسە-ءمينيسترى اسەت تۇرىسوۆتان بيۋجەتتى ازىرلەۋدە جاساندى ينتەللەكتىنىڭ كومەگىنە جۇگىنە مە دەگەن ساۋال قويدى.

- مەملەكەتتىك جوسپارلاۋدا جاساندى ينتەللەكت قولدانىلمادى. بۇگىنگى ۇكىمەت وتىرىسىندا سالالىق جاساندى ينتەللەكتىنىڭ داميتىنى ايتىلدى. قارجى مينيسترلىگى بۇل ماسەلەنى زەرتتەپ، كىرىستەر مەن شىعىستاردى جوسپارلاۋ كەزىندە دەرەكتەردى جۇكتەۋدى جوسپارلاپ وتىرمىز، ياعني بەلگىلى ءبىر كىرىستەر مەن شىعىستاردى بولجاۋ كەزىندە جاساندى ينتەللەكتىنى پايدالانۋ، - دەپ جاۋاپ بەردى اسەت تۇرىسوۆ.

ۆيتسە-ءمينيستردىڭ ايتۋىنشا، مەملەكەتتىك جوسپارلاۋ سالاسىنا جاساندى ينتەللەكتىنى ەنگىزۋ 2025-جىلعا جوسپارلانعان.

- سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ ەنگىزەتىن بولامىز. بيۋجەتتى جوسپارلاۋ كەزىندە، بيۋجەتتىك وتىنىمدەردى قاراۋ كەزىندە دەرەكتەردى جىلدام جىبەرۋ تۇرعىسىندا قولدانىلادى. بۇل جۇمىس بۇگىندە قولمەن جاسالادى نەمەسە تالداۋشىلار دەڭگەيىندە عانا تالقىلانادى، - دەيدى ول.

ايتا كەتەيىك، بۇگىن ۇكىمەتتىڭ كوشپەلى وتىرىسى سيفرلاندىرۋ جانە جاساندى ينتەللەكت تاقىرىبىنا ارنالدى. بەلگىلى بولعانداي، كەلەر جىلدان باستاپ مەملەكەتتىك قىزمەتشىلەر جاساندى ينتەللەكت كۋرسىنان وتەدى.

سونداي-اق، پرەمەر-مينيستر ولجاس بەكتەنوۆ سيفرلىق قىزمەتتىڭ دەنى حالىق ءۇشىن كۇردەلى ەكەنىن ايتىپ، پروتسەستى جەڭىلدەتۋدى جۇكتەدى.

ودان بولەك، ۇكىمەت باسشىسى نەيروندىق جەلىلەر ارقىلى توتەنشە جاعدايلاردى بولجاپ، الدىن الۋ مۇمكىندىگى تۋرالى ايتتى.