ەلىمىزدە ايىپپۇل سوماسى ۇلعايدى
بيىل ايلىق ەسەپتىك كورسەتكىش مولشەرى 240 تەڭگەگە ءوستى. ياعني، 3692 تەڭگەدەن 3932 تەڭگەگە كوتەرىلدى.
مۇنىڭ جاقسى جاعى - جاردەماقى مەن زەينەتاقى كولەمى دە وسەدى. دەگەنمەن، ايىپپۇل كولەمى دە وسى ايلىق ەسەپتىك كورسەتكىش سوماسىنا قاراي ۇلعايادى. بۇل ماسەلە كولىكپەن ءجيى جۇرەتىن ازاماتتاردى الاڭداتۋعا ءتيىس. جالپى جول- كولىك ەرەجەسىن بۇزعاندارعا سالىناتىن ايىپپۇل سوماسى قانشالىق ءوستى؟
نۇرقانات قاناپيا، ءتىلشى:
- ايلىق ەسەپتىك كورسەتكىش مولشەرىنە قاراي ايىپپۇل سوماسى دا ءوسىپ وتىر. بيىل جول ەرەجەسىن بۇزعاندا سالىناتىن ايىپپۇل سوماسى % 6 تەن اسا ءوستى. ماسەلەن، بيىل بەلگىلەنگەن مەجەدەن 20 شاقىرىم ساعاتقا اسىرعاندارعا 19660 تەڭگە ايىپپۇل قاراستىرىلعان. سول سياقتى 40 شاقىرىم ساعاتقا دەيىن جىلدامدىق اسىرعاندار 39320 تەڭگە تولەيدى. ساعاتىنا 40 شاقىرىمنان اسىرا قاتتى جۇرگەندەر 78640 تەڭگە شىعىندانادى. سونداي-اق جۇرگىزۋشى كۋالىگى جوق بولسا دا، كولىك جۇرگىزگەندەرگە 5 ايلىق ەسەپتىك كورسەتكىش مولشەرىندە ايىپپۇل بەلگىلەنگەن. جول بەلگىلەرىن نەمەسە جولاقتاردى ەلەمەي باسىپ وتكەندەرگە 11796 تەڭگە ايىپپۇل سالىنادى. باعدارشامنىڭ قىزىل شامىنا ءوتىپ كەتكەندەر العاشىندا 39320 تەڭگە تولەيدى. ال سول ءتارتىپ بۇزۋشىلىقتى قايتالاسا، 58980 تەڭگە شىعىندانۋعا ءماجبۇر بولادى. جالپى بىلتىر جەلتوقساندا كۇرەجولداعى ورتاشا جىلدامدىقتى ولشەيتىن رەجيم ەنگىزىلدى. بۇل رەجيمگە سايكەس، 1-ا ساناتىنداعى جولدارداعى ورتاشا جىلدامدىق ساعاتىنا 140 شاقىرىمنان اسپاۋعا ءتيىس. ال 1-ب نەمەسە 2- ساناتتاعى جولداردا ساعاتىنا 110 شاقىرىم جىلدامدىقپەن عانا ءجۇرۋ كەرەك. ال ەگەر جۇرگىزۋشى ءبىر نۇكتەدەن ەكىنشى نۇكتەگە بەلگىلەنگەن ۋاقىتتان بۇرىن بارىپ قويسا، جولدا جىلدامدىقتى اسىرعان دەگەن ءسوز.
يگور لەپەحا، ق ر ىشكى ىستەر ءمينيسترىنىڭ ورىنباسارى:
- قازىر ءبىز 16 ۋچاسكەنى انىقتادىق. جاڭا رەجيم وسى ارالىقتاردا سىناقتان ءوتىپ جاتىر. ازىرگە ەشكىمگە ايىپپۇل سالىنعان جوق. ءبىراق ءبىر ايدىڭ ىشىندە ورتاشا جىلدامدىقتى اسىرعان 500 دەن استام دەرەك تىركەلدى. بيىلدان باستاپ موپەدتەر دە تىركەۋگە الىنادى. ياعني، الداعى ءساۋىر ايىنان باستاپ موپەد يەلەرى كولىكتەرىن مىندەتتى تۇردە تىركەۋگە ءتيىس. جول ەرەجەسىن بۇزعان جاعدايدا باسقا كولىكتەر سياقتى ولارعا دا ايىپپۇل سالىنادى.
ەلەكتروموبيل قوجايىنى دا ءوز كولىگىنە ارنايى بەلگى ورناتۋعا مىندەتتەلەدى. ال ەگەر ول بەلگى بولماسا، 11796 تەڭگە ايىپپۇل تولەۋگە ءتيىس. بۇل ارنايى بەلگىلەردى كولىك قۇرالدارىن تىركەيتىن ورىننان الۋعا بولادى. سونداي-اق شەتەلدىك نومەرمەن جۇرگەن جۇرگىزۋشىلەر دە كولىگىن مىندەتتى تۇردە تىركەۋى كەرەك. ال تىركەمەگەن جۇرگىزۋشىلەرگە 196600 تەڭگەدەن 2 ميلليون 200 مىڭ تەڭگەگە دەيىن ايىپپۇل قاراستىرىلعان. بۇل جەردە ايىپپۇل سوماسى كولىك قوزعالتقىشىنىڭ كولەمىنى قاراي وزگەرەدى.
https://24.kz
