ەلىمىزدە ايەل تەرگەۋشىلەر كوبەيەدى
بۇگىندە ەلىمىزدە جەدەل-تەرگەۋ توپتارىنىڭ قۇرامىندا 280 ايەل-تەرگەۋشى بار. اتالعان تاجىريبە بۇكىل ەل اۋماعىنا ەنگىزىلەدى. بۇل تۋرالى ءماجىلىس ءتوراعاسى ەرلان قوشانوۆ ءمالىم ەتتى، دەپ حابارلايدى Kazinform.
«پرەزيدەنت تاپسىرماسى بويىنشا سوڭعى 2 جىلدا ايەلدەردى زورلىق-زومبىلىقتان قورعاۋ جونىندەگى ينسپەكتورلاردىڭ شتات سانى ەكى ەسە ءوستى. كەيدە ايەلدى تەك ايەل عانا تۇسىنە الادى. سوندىقتان ءبىز ايەلدەر مەن كامەلەتكە تولماعاندارعا قاتىستى زورلىق-زومبىلىقتى تەرگەيتىن ايەل تەرگەۋشىلەردى كوبەيتۋىمىز كەرەك»، -دەدى ەرلان قوشانوۆ ەلوردادا ءوتىپ جاتقان «ورتالىق ازيا ەلدەرى ايەلدەرىنىڭ ديالوگى» كونفەرەنتسياسىندا.
ونىڭ ايتۋىنشا، بۇگىندە رەسپۋبليكا بويىنشا جەدەل-تەرگەۋ توبىنىڭ قۇرامىندا 280 ايەل-تەرگەۋشى بار.
«قازاقستاندا العاش رەت پيلوتتىق رەجيمدە ايەلدەر پوليسيا بولىمشەسى قۇرىلدى، وندا تەك ايەلدەر جۇمىس ىستەيدى. ەندى زارداپ شەككەن ايەلدەر ۋچاسكەگە كەلىپ ءوز قيىندىقتارىن ەركىن ايتىپ، كومەك سۇراي الادى. جاقىن ارادا بۇل تاجىريبە بۇكىل ەل اۋماعىنا ەنگىزىلەدى. ءبىز پروبلەمانىڭ سالدارىمەن عانا كۇرەسپەي، سونىمەن بىرگە زورلىق-زومبىلىقتىڭ تۋىنداۋىنىڭ الدىن الۋىمىز كەرەك»،-دەيدى ول.
ەلوردادا «ورتالىق ازيا ەلدەرى ايەلدەرىنىڭ ديالوگى» كونفەرەنسياسى ءوتىپ جاتىر.
اتالعان شاراعا وزبەكستان، قىرعىزستان، تۇرىكمەنستان، تاجىكستان ەلدەرىنىڭ وكىلدەرى قاتىسۋدا.
