ەلىمىزدە اتاۋلى الەۋمەتتىك كومەكتى ەسەپتەۋ جۇيەسى قالاي وزگەرەدى

استانا. KAZINFORM - بيىل اقپاندا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ۆەدومستۆو القاسىندا ەلىمىزدە اتاۋلى الەۋمەتتىك كومەكتى تولىق ترانسفورماتسيالاۋ كۇتىپ تۇرعانىن مالىمدەدى.

اتاۋلى الەۋمەتتىك كومەككە قاتىستى تولەمدى ەسەپتەۋ جۇيەسى قالاي وزگەرەتىنى تۋرالى Kazinform اگەنتتىگى مينيسترلىككە رەسمي ساۋال جولداعان ەدى.

از قامتىلعان ازاماتتاردى الەۋمەتتىك قولداۋ ءۇشىن ەلىمىزدە اتاۋلى الەۋمەتتىك كومەك كورسەتىلەدى. ول اقشالاي تولەمنەن باسقا، ەڭبەككە قابىلەتتى ازاماتتاردى جۇمىسپەن قامتۋعا جاردەمدەسۋ، سونداي-اق مەكتەپ جاسىنا دەيىنگى بالالارعا قوسىمشا تولەمدى قامتيدى.

ا ا ك كورسەتۋ مۇقتاجدىقتى باعالاۋمەن جانە وتباسىنىڭ ەڭبەككە قابىلەتتى مۇشەلەرىن جۇمىسقا ورنالاستىرۋ شارتىمەن جۇزەگە اسىرىلادى. تاعايىندالعان كومەكتىڭ مولشەرى وتباسىنىڭ جيىنتىق تابىسىنا بايلانىستى.

ەڭبەك مينيسترلىگى مەملەكەت باسشىسىنىڭ تاپسىرماسىن ورىنداۋ ءۇشىن ازاماتتاردىڭ كىرىسى مەن شىعىسىن ەسكەرە وتىرىپ، ا ا ك كورسەتۋدىڭ بيزنەس- پروتسەسىن ترانسفورماتسيالاۋ تەتىگىن ازىرلەۋ بويىنشا جۇمىس جۇرگىزىلىپ جاتقانى ايتىلدى. ا ا ك تاعايىنداۋ مەملەكەتتىك ورگانداردىڭ باسقا اقپاراتتىق جۇيەلەرىمەن ينتەگراتسيالانعان «الەۋمەتتىك كومەك» جۇيەسى ارقىلى تولىق اۆتوماتتاندىرىلعان.

«مۇددەلى مەملەكەتتىك ورگاندارمەن بىرلەسىپ ازاماتتاردىڭ نەگىزگى شىعىستارىن ەسەپكە الۋ جانە ۆەريفيكاتسيالاۋ تەتىگى پىسىقتالىپ جاتىر. ونىڭ اياسىندا جىلجىمالى جانە جىلجىمايتىن مۇلىكتى ساتىپ الۋ، وقىتۋ مەن قوسىمشا ءبىلىم الۋعا اقى تولەۋ، ساياحات شىعىندارى، ساناتوريي- كۋرورتتىق ەمدەۋ، اۋديوۆيزۋالدى جابدىقتى ساتىپ الۋ، جيھاز، تۇرمىستىق تەحنيكا ساتىپ الۋ، كرەديتتەردى وتەۋ جانە تاعى باسقا نەگىزگى شىعىس تۇرلەرى كوزدەلىپ وتىر»، - دەپ ءتۇسىندىردى اتالعان ۆەدومستۆو.

ازاماتتاردىڭ شىعىستارى تۋرالى مالىمەتتەردى الۋ ءۇشىن ونەركاسىپ جانە قۇرىلىس، سيفرلىق دامۋ، يننوۆاتسيالار جانە اەروعارىش ونەركاسىبى، دەنساۋلىق ساقتاۋ، وقۋ- اعارتۋ، عىلىم جانە جوعارى ءبىلىم مينيسترلىكتەرىنىڭ، ۇلتتىق بانكتىڭ باسقا دا قۇزىرلى ۇيىمداردىڭ اقپاراتتىق جۇيەلەرىن ينتەگراتسيالاۋ جۇرگىزىلەدى.

سونداي-اق، ەڭبەك جانە حالىقتى الەۋمەتتىك قورعاۋ مينيسترلىگى 2025 -جىلدىڭ 1 -قاڭتارىنان باستاپ كەدەيلىك شەگىنىڭ مولشەرى حالىقتىڭ ورتاشا تابىسى نەگىزىندە انىقتالاتىنىن ەسكە سالدى. وتباسىنىڭ ءاربىر مۇشەسىنە ااك مولشەرى بەلگىلى ءبىر سالا ءۇشىن ورتاشا تابىس كورسەتكىشىنە بايلانىستى ايقىندالادى. ااك تاعايىنداۋ كريتەرييى كەدەيلىك شەگى بولىپ تابىلادى، ونىڭ مولشەرى ورتاشا تابىستىڭ %50 نا تەڭەستىرۋ جوسپارلانىپ وتىر.

«ەگەر ءاربىر وتباسى مۇشەسىنىڭ تابىسى وسى كورسەتكىشتەن تومەن بولسا، ايىرماشىلىق ا ا ك مولشەرىنە تەڭ. وسىعان بايلانىستى، ءاربىر ناقتى وتباسى ءۇشىن ا ا ك تاعايىندالعان سوماسىنىڭ مولشەرى جەكە انىقتالادى، ياعني جيىنتىق تابىستىڭ مولشەرىنە جانە كەدەيلىك شەگىنە بايلانىستى»، - دەپ حابارلادى مينيسترلىك.