ەلىمىزدە اپتا ىشىندە بولعان كادرلىق تاعايىنداۋلار

استانا. KAZINFORM - وتكەن اپتادا ەلىمىزدە ءبىرقاتار كادرلىق اۋىس-ءتۇيىس بولدى. اتاپ ايتقاندا، دوس جۇرماحانبەت ۇلى - ونكولوگيالىق اۋرۋلارمەن كۇرەس سالاسىنداعى الەمدەگى جەتەكشى عالىم. ول قازاقستان ۇلتتىق عىلىم اكادەمياسىنىڭ ۆيتسە-پرەزيدەنتى بولىپ تاعايىندالدى.

پروفەسسور دوس سارباسوۆ - نازاربايەۆ ۋنيۆەرسيتەتىنىڭ جاراتىلىس تانۋ، الەۋمەتتىك جانە گۋمانيتارلىق عىلىمدار مەكتەبىنىڭ وقىتۋشىسى، بيوحيميا جانە مولەكۋلالىق بيولوگيا عىلىمدارىنىڭ كانديداتى (ا ق ش). دوكتور سارباسوۆ ۇزاق ۋاقىت امەريكالىق MD اندەرسون ونكولوگيا ورتالىعىندا جۇمىس ىستەپ، 27 جىلدان كەيىن قازاقستانعا ورالدى. 2020 -جىلدان بەرى پروفەسسور نازاربايەۆ ۋنيۆەرسيتەتىندەگى National Laboratory Astana زەرتحاناسىن باسقارادى. كومانداسىمەن بىرگە پروفەسسور قاتەرلى ىسىكتىڭ KRAS- مۋتانتتى تۇرلەرىن ەمدەۋدى اياقتاۋدى كوزدەپ وتىر. ول س دارۋمەنىنىڭ جوعارى دوزاداعى D- فورماسىنىڭ (D- VC) شاعىن كونسەنتراتسياداعى كۇشالامەن (arsenic trioxide, ATO) قوسىندىسىنا نەگىزدەلگەن.

سارباسوۆ 80 نەن استام عىلىمي جاريالانىم مەن 37 قولجازبانىڭ اۆتورى، mTOR اقۋىزىنىڭ وسۋدەگى، جاسۋشالاردىڭ كوبەيۋىندەگى، م ر ن ق ترانسكريپتسياسىنداعى جانە جاسۋشا ىشىندەگى اقۋىز بيوسينتەزىندەگى ءرولىن اشۋشىلاردىڭ ءبىرى. امەريكالىق بيوحيميا جانە مولەكۋلالىق بيولوگيا قاۋىمداستىعىنىڭ، پرەزيدەنت جانىنداعى عىلىم جانە تەحنولوگيالار جونىندەگى ۇلتتىق كەڭەستىڭ مۇشەسى.

جوعارعى سوتتىڭ كوممۋنيكاتسيا ءبولىمىنىڭ مەڭگەرۋشىسى قىزمەتىنە پەريزات ءسادۋاقاس تاعايىندالدى.

پەريزات ءسادۋاقاس قاراعاندى وبلىسىندا دۇنيەگە كەلگەن. ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتىن بىتىرگەن، تاريحشى، زاڭگەر. تاريح عىلىمدارىنىڭ كانديداتى. 4- ساناتتى بىلىكتىلىك سىنىبى بار.

2002-2009 -جىلدارى قاراعاندى قالاسىنداعى م. جۇمابايەۆ اتىنداعى №39-مەكتەپ-گيمنازيانىڭ، ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتى تاريح فاكۋلتەتىنىڭ وقىتۋشىسى، قاراعاندى مەملەكەتتىك مەديتسينا اكادەمياسىنىڭ وقۋ- كلينيكالىق ورتالىعىنىڭ ينسپەكتورى؛ 2009-2017 -جىلدارى قاراعاندى وبلىستىق تىلدەردى دامىتۋ باسقارماسىنىڭ جەتەكشى مامانى، ق ر مادەنيەت جانە اقپارات مينيسترلىگى اقپارات جانە مۇراعات كوميتەتىنىڭ ساراپشىسى، ق ر پرەزيدەنتى ءباسپاسوز قىزمەتىنىڭ رەفەرەنتى، ساراپشىسى، ق ر پرەزيدەنتى اكىمشىلىگى ىشكى ساياسات ءبولىمىنىڭ ساراپشىسى، ينسپەكتورى، «م. نارىكبايەۆ اتىنداعى كازگيۋۋ» ا ق باسقارما ءتوراعاسىنىڭ كەڭەسشىسى؛ 2019-2024 -جىلدارى ق ر سىبايلاس جەمقورلىققا قارسى ءىس-قيمىل اگەنتتىگىنىڭ (سىبايلاس جەمقورلىققا قارسى قىزمەت) سەرىكتەستىك دەپارتامەنتى ديرەكتورىنىڭ ورىنباسارى، ديرەكتورى، ق ر سىبايلاس جەمقورلىققا قارسى ءىس-قيمىل اگەنتتىگىندە (سىبايلاس جەمقورلىققا قارسى قىزمەت) ۇزدىكسىز قىزمەت، ۇلىتاۋ وبلىسى اكىمىنىڭ، ق ر اقپارات جانە قوعامدىق دامۋ ءمينيسترىنىڭ كەڭەسشىسى، ق ر مادەنيەت جانە اقپارات مينيسترلىگىنىڭ ازاماتتىق قوعام ىستەرى كوميتەتى ءتوراعاسىنىڭ ورىنباسارى بولعان، «قۇرمەت» وردەنىمەن، «قازاقستان كونستيتۋتسياسىنا 20 جىل» مەرەكەلىك مەدالىمەن ماراپاتتالعان.

AMANAT پارتياسى ساياسي كەڭەسى بيۋروسىنىڭ قاۋلىسىمەن پارلامەنت ءماجىلىسى دەپۋتاتىنىڭ پارتيالىق ءتىزىم بويىنشا بوس مانداتى بايتىلەسوۆ نۇرسۇلتان تولەن ۇلىنا بەرىلدى.

نۇرسۇلتان بايتىلەسوۆ 1991 -جىلى تۋعان. م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىن «قۇقىقتانۋ» ماماندىعى بويىنشا، وڭىرلىك الەۋمەتتىك- يننوۆاتسيالىق ۋنيۆەرسيتەتىن «ەكونوميكا جانە بيزنەس» ماماندىعى بويىنشا بىتىرگەن. زاڭ عىلىمدارىنىڭ ماگيسترى.

2009 -جىلدان باستاپ استانا قالاسى الماتى اۋداندىق سوتىنىڭ جەتەكشى مامانى، باس مامان-سوت وتىرىسىنىڭ حاتشىسى، سوت پريستاۆى، باس مامانى، اتىراۋ، پاۆلودار وبلىستىق سوتتارىنىڭ كەڭسەسى باسشىسىنىڭ ورىنباسارى، جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باس كونسۋلتانتى بولىپ قىزمەت اتقارعان. 2016-2018 -جىلدارى جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ حالىقارالىق بايلانىستار جانە پروتوكول ءبولىمى مەڭگەرۋشىسىنىڭ ورىنباسارى بولعان. 2020 -جىلى نۇرسۇلتان تولەن ۇلى بايتىلەسوۆ جوعارعى سوت اپپاراتى باسشىسىنىڭ ورىنباسارى قىزمەتىن اتقاردى. ول جاس كادرلار رەزەرۆى قۇرامىنا كىرگەن.

اقتوبە وبلىستىق دەنساۋلىق ساقتاۋ باسقارماسىنىڭ باسشىسى قىزمەتىنە نۇربول تىمپيەۆ تاعايىندالدى.

نۇربول تىمپيەۆ 1991 -جىلى قوستاناي وبلىسىندا دۇنيەگە كەلگەن. 2014 -جىلى مارات وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىن، 2018 -جىلى چەحيا رەسپۋبليكاسىنىڭ حالىقارالىق ەكونوميكالىق ينستيتۋتىن، 2023 -جىلى بايىشەۆ ۋنيۆەرسيتەتىن ءتامامداعان.

ەڭبەك جولىن 2014 -جىلى قوستاناي وبلىسىنىڭ ناۋرىزىم اۋداندىق ورتالىق اۋرۋحاناسىنىڭ دارىگەرى بولىپ باستاعان. 2015-2018 -جىلدارى قوستاناي ونكولوگيالىق ديسپانسەرىنىڭ دارىگەرى، №1-اقتوبە قالالىق ەمحاناسىنىڭ دارىگەرى، اقتوبە وبلىستىق اۋرۋحاناسىنىڭ ەپيدەميولوگ دارىگەرى، وتباسىلىق مەديتسينا ورتالىعىنىڭ ەپيدەميولوگ دارىگەرى بولىپ جۇمىس ىستەگەن. 2018-2023 -جىلدارى «اسىل- مەد» ج ش س-نىڭ ديرەكتورى، قارعالى قالالىق اۋرۋحاناسى باس دارىگەرىنىڭ ورىنباسارى، «الەۋمەتتىك مەديتسينالىق ساقتاندىرۋ قورى» ك ە ا ق ا و ف ساتىپ الۋ ءبولىمىنىڭ باسشىسى قىزمەتتەرىن اتقارعان

اقتوبە وبلىستىق ەنەرگەتيكا جانە تۇرعىن- ءۇي كوممۋنالدىق شارۋاشىلىعى باسقارماسى باسشىسى قىزمەتىنە ارىسۇلان ايتبايەۆ تاعايىندالدى.

ارىسۇلان ايتبايەۆ اقتوبە وبلىسىنىڭ ىرعىز اۋدانىندا دۇنيەگە كەلگەن. جوعارى ءبىلىمدى مامان 2009 -جىلى قازاق باس ساۋلەت-قۇرىلىس اكادەمياسىن ءتامامداعان.

ەڭبەك جولىن 2009 -جىلى «بوگومولوۆپرەكتگرۋپپ» ج ش س-نىڭ جوبالاۋشى ينجەنەرى بولىپ باستاعان. قۇرىلىس، سونىڭ ىشىندە ينجەنەرلىك جەلىلەر قۇرىلىسىمەن اينالىساتىن جەكە كاسىپكەرلىك سۋبەكتىلەرىندە ءتۇرلى لاۋازىمدا جۇمىس ىستەگەن. 2023 -جىلدىڭ قاراشا ايىنان باستاپ وسى كەزگە دەيىن «Aqtobe su-energy group» ا ق باس ديرەكتورىنىڭ ورىنباسارى قىزمەتىن اتقارىپ كەلدى.

سولتۇستىك كاسپي جوباسىنىڭ وپەراتورى - NCOC كومپانياسىنىڭ جاڭا باسقارۋشى ديرەكتورى لاۋازىمىن دجانكارلو رۋيۋ اتقاراتىن بولدى.

دجانكارلو رۋيۋدىڭ قازاقستاندا جانە حالىقارالىق اۋقىمداعى مۇناي- گاز كەن ورىندارىن باسقارۋ ستراتەگياسى سالاسىندا جيىرما جىلدان استام تاجىريبەسى بار. ول يتالياداعى پيزا ۋنيۆەرسيتەتىن ءبىتىرىپ، «ازاماتتىق قۇرىلىس» ماگيسترى دارەجەسىن العان. سودان بەرى باسقارۋشىلىق داعدىسىن جەتىلدىرىپ، مۇددەلى تاراپتارمەن بەرىك قارىم-قاتىناس ورناتۋ بويىنشا تاجىريبە جيناقتادى. ول ءتۇرلى وندىرىستىك جوبالاردىڭ بارلاۋ، يگەرۋ جانە پايدالانۋ، سونداي-اق بيزنەستى دامىتۋ جۇمىستارىنىڭ تولىق سيكلىن قامتيتىن سالالارىنا جاۋاپتى جۇمىستاردى اتقارىپ كەلدى.

ءار جىلدارى ابۋ-دابيدەگى Eni/ADNOC بىرلەسكەن كاسىپورنىندا جەرۇستى وپەراتسيالارى باعدارلاماسىنىڭ جەتەكشىسى، «eni Ghana» كومپانياسىنىڭ باسقارۋشى ديرەكتورى، «North Caspian Operating Company» كومپانياسىنىڭ 1-كەزەڭدى ازىرلەۋ جونىندەگى ديرەكتورى لاۋازىمىن اتقارعان. وسى كەزگە دەيىن «Karachaganak Petroleum Operating B. V.» كومپانياسىنىڭ باس ديرەكتورى بولعان.

اۆتور

مارلان جيەمباي