ەلىمىزدە اپتا ىشىندە بولعان كادرلىق تاعايىنداۋلار

استانا. KAZINFORM - وتكەن اپتادا ەلىمىزدە ءبىرقاتار كادرلىق اۋىس-ءتۇيىس بولدى. Kazinform اگەنتتىگى 15-21-شىلدە ارالىعىندا بولعان تاعايىنداۋلارعا شولۋ ۇسىنادى.

اپتا باسىندا ق ر دەنساۋلىق ساقتاۋ ۆيتسە-ءمينيسترى قىزمەتىنە ەرجان شاكىر ۇلى نۇرلىبايەۆ تاعايىندالدى.

ەرجان نۇرلىبايەۆ 1975 -جىلى تەمىرتاۋ قالاسىندا دۇنيەگە كەلگەن. قاراعاندى مەملەكەتتىك مەديتسينا اكادەمياسىن «ەمدەۋ ءىسى» ماماندىعى بويىنشا، قازتۇتىنۋوداعى قاراعاندى ەكونوميكالىق ۋنيۆەرسيتەتىن «مەنەدجمەنت» ماماندىعى بويىنشا بىتىرگەن. ەڭبەك جولىن 1998 -جىلى قاراعاندى №1 قالالىق اۋرۋحاناسىندا دارىگەر-حيرۋرگ بولىپ باستاعان.

2004-2006 -جىلدارى ە. نۇرلىبايەۆ اتالعان مەديتسينالىق مەكەمە ديرەكتورىنىڭ ەمدەۋ ءىسى جونىندەگى ورىنباسارى قىزمەتىن اتقاردى. ءار جىلدارى قاراعاندى وبلىسىنىڭ باس حيرۋرگى بولىپ قىزمەت ىستەدى، ح. ج. ماقاجانوۆ اتىنداعى وبلىستىق تراۆماتولوگيا جانە ورتوپەديا ورتالىعىن باسقاردى. 2014-2021 -جىلدارى - قاراعاندى وبلىسى دەنساۋلىق ساقتاۋ باسقارماسىنىڭ باسشىسى، 2021 -جىلدان باستاپ «ق م ۋ» ك ە ا ق ديرەكتورلار كەڭەسىنىڭ ءتوراعاسى، قازىرگى ۋاقىتقا دەيىن قاراعاندى وبلىستىق كلينيكالىق اۋرۋحانانىڭ ديرەكتورى بولىپ جۇمىس ىستەدى.

ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى جاساندى ينتەللەكت جانە يننوۆاتسيالاردى دامىتۋ كوميتەتىنىڭ ءتوراعاسى قىزمەتىنە عيززات سەيداحمەت ۇلى بايتۇرسىنوۆ تاعايىندالدى.

عيززات بايتۇرسىنوۆ مالايزيانىڭ ازيا-تىنىق مۇحيتى تەحنولوگيالار جانە يننوۆاتسيالار ۋنيۆەرسيتەتىن جانە د. ا. قونايەۆ اتىنداعى ەۋرازيالىق زاڭ اكادەمياسىن بىتىرگەن. كاسىبي مانسابىن جەكە كومپانيادا باعدارلاماشى بولىپ باستاعان.

2019 -جىلى ق ر سيفرلىق دامۋ، قورعانىس جانە اەروعارىش ونەركاسىبى مينيسترلىگىنىڭ ەلەكتروندىق يندۋستريانى دامىتۋ دەپارتامەنتىندە «جاستار تاجىريبەسى» باعدارلاماسىنا قاتىستى. 2020-2023 -جىلدار ارالىعىندا سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ ەلەكترونيكا ونەركاسىبىن جانە سيفرلىق اكتيۆتەر يندۋسترياسىن دامىتۋ دەپارتامەنتىنىڭ ساراپشىسى، باس ساراپشىسى، باسقارما ديرەكتورى جانە ديرەكتورىنىڭ ورىنباسارى قىزمەتتەرىن اتقارعان. 2023 -جىلدان باستاپ قازىرگى ۋاقىتقا دەيىن ICRIAP ەلەكتروندى يندۋستريانى جانە سيفرلىق اكتيۆتەر يندۋسترياسىن دامىتۋ دەپارتامەنتىنىڭ ديرەكتورى بولدى.

وڭىرلەر بويىنشا، اقتاۋ قالاسىنىڭ اكىمى قىزمەتىنە بايپاقوۆ ءابىلقايىر جاڭاي ۇلى تاعايىندالدى.

ءابىلقايىر بايپاقوۆ 1978 -جىلى ماڭعىستاۋ وبلىسى شەتپە اۋىلىندا دۇنيەگە كەلگەن. مەملەكەتتىك جانە جەرگىلىكتى باسقارۋ ماماندىعى بويىنشا جوعارى ءبىلىمى بار. وسى جىلدار ىشىندە وبلىستىڭ مەملەكەتتىك ورگاندارىندا، ونىڭ ىشىندە ماڭعىستاۋ وبلىسىنىڭ ىشكى ساياسات باسقارماسى مەن مادەنيەت باسقارماسىندا، اقتاۋ قالاسى، ءتۇپقاراعان جانە قاراقيا اۋداندارى اكىمى اپپاراتىندا، وبلىس اكىمى اپپاراتىندا باسشى، باياندى اۋىلىنىڭ اكىمى، «كاسپيي» اكك ۇك» اق ديرەكتورى، اقتاۋ قالاسى اكىمىنىڭ ورىنباسارى قىزمەتتەرىن اتقارعان. 2023 -جىلدان بۇگىنگى كۇنگە دەيىن ماڭعىستاۋ وبلىسىنىڭ مادەنيەت، ارحيۆتەر جانە قۇجاتتاما باسقارماسىنىڭ باسشىسى بولدى.

جەتىسۋ وبلىسى اكىمىنىڭ وكىمىمەن دياس راحمەت ۇلى ەسداۋلەتوۆ جەتىسۋ وبلىسى اكىمىنىڭ ورىنباسارى بولىپ تاعايىندالدى.

دياس راحمەت ۇلى ەسداۋلەتوۆ 1987 -جىلى تالدىقورعان قالاسىندا تۋعان. جوعارى ءبىلىمدى. شاڭحاي جياۋ توڭ ۋنيۆەرسيتەتىن اقپاراتتىق تەحنولوگيالار جانە تەلەكوممۋنيكاتسيا جۇيەلەرى ماماندىعى بويىنشا بىتىرگەن. «بولاشاق» باعدارلاماسىنىڭ تۇلەگى. ەڭبەك جولىن استانا قالاسىندا «2011 -جىلعى VII قىسقى ازيا ويىندارىنىڭ ۇيىمداستىرۋ كوميتەتىنىڭ اتقارۋشى ديرەكتسياسى» ا ق-نىڭ تەحنيكالىق سۇراقتار بويىنشا باس ساراپشىسى بولىپ باستادى.

ءار جىلدارى «ۇلتتىق اقپاراتتىق تەحنولوگيالار» ا ق ەلەكتروندىق قىزمەتتەردى ىلگەرىلەتۋ دەپارتامەنتىنىڭ مەنەدجەرى، «قازكونتەنت» ا ق-دا اقپاراتتىق- تالداۋ ورتالىعىنىڭ اقپاراتتىق جوبالار مونيتورينگى جونىندەگى مامانى، ورتالىق باسشىسى، جوبالاردى باسقارۋ دەپارتامەنتىنىڭ ديرەكتورى، «قازاقستان تاريحى» ينتەرنەت-جوباسىنىڭ باسشىسى، مەديا جوبالار بويىنشا باسقارۋشى ديرەكتور، ق ر پرەزيدەنتى جانىنداعى «ورتالىق كوممۋنيكاتسيالار قىزمەتى» ر م م اقپاراتتىق جوسپارلاۋ قىزمەتىنىڭ باسشىسى، مەديا جوسپارلاۋ جانە وڭىرلەردەگى جۇمىس باسقارماسىنىڭ باسشىسى بولعان.

ق ر اقپارات جانە كوممۋنيكاتسيا مينيسترلىگىنىڭ اقپارات كوميتەتى قوعاممەن بايلانىس ورناتۋ جانە مەملەكەتتىك ورگاندارمەن ۇيلەستىرۋ باسقارماسىنىڭ باسشىسى، ق ر پرەمەر-ءمينيسترى باسپا ءسوز قىزمەتىنىڭ باس ساراپشىسى، ق ر پرەمەر-ءمينيسترى كەڭسەسىنىڭ اقپاراتتىق-تالداۋ ورتالىعىنىڭ جەدەل اقپارات سەكتورىنىڭ مەڭگەرۋشىسى، ورتالىق مەڭگەرۋشىسىنىڭ ورىنباسارى، ق ر پرەزيدەنتىنىڭ اكىمشىلىگى تالداۋ جانە بولجاۋ ورتالىعى مەڭگەرۋشىسىنىڭ ورىنباسارى، الماتى قالاسى اكىمدىگىنىڭ قوعامدىق دامۋ باسقارماسىنىڭ باسشىسى لاۋازىمدارىن اتقاردى. 2022 -جىلدىڭ ناۋرىزىنان ق ر پرەزيدەنتى جانىنداعى «ورتالىق كوممۋنيكاتسيالار قىزمەتى» رمم ديرەكتورىنىڭ ورىنباسارى بولدى.

پاۆلودار وبلىسى اكىمىنىڭ ينۆەستيتسيالار جانە بيزنەستى دامىتۋ بويىنشا ورىنباسارى لاۋازىمىنا قابىلتايەۆا ايگەرىم جاڭبىرتاي قىزى تاعايىندالدى.

ايگەرىم جاڭبىرتاي قىزى 1984 -جىلى تۋعان. «باكالاۆر- حيميا» ماماندىعى بويىنشا جوعارى ءبىلىمى جانە ەكولوگيا ماگيسترى دارەجەسى بار. ەڭبەك جولىن 2007 -جىلى پاۆلودار وبلىسىنىڭ قورشاعان ورتانى قورعاۋ باسقارماسىنىڭ جەتەكشى مامانى بولىپ باستاپ، كەيىن وبلىستىق جەر قويناۋىن پايدالانۋ، قورشاعان ورتا جانە سۋ رەسۋرستارى دەپارتامەنتىندە باسشىلىق لاۋازىمداردا قىزمەت اتقاردى. 2021 -جىلدان باستاپ وسى لاۋازىمعا تاعايىندالعانعا دەيىن پاۆلودار وبلىسىنىڭ جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسىنىڭ باسشىسى بولىپ ەڭبەك ەتتى.

پاۆلودار وبلىسى قۇرىلىس باسقارماسىنىڭ باسشىسى بولىپ اسقار اجمۇرات تاعايىندالدى.

اسقار قادىر ۇلى 1976 -جىلى تۋعان، جوعارى تەحنيكالىق ءبىلىمى بار.1999 -جىلى س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىن «ينجەنەر- قۇرىلىسشى- تەحنولوگ» ماماندىعى بويىنشا اياقتاعان. ەڭبەك جولىن 1999 -جىلى پاۆلودار فارماتسيەۆتيكالىق زاۋىتىندا جابدىقتاۋ بويىنشا مەنەدجەر بولىپ باستاعان. ودان كەيىن 2001-2002 -جىلدار ارالىعىندا مەملەكەتتىك ەمەس قۇرىلىمداردا ەڭبەك ەتتى. 2002 -جىلدان 2024 -جىلعا دەيىن پاۆلودار وبلىسىنىڭ جەرگىلىكتى اتقارۋشى ورگاندارىندا ءتۇرلى لاۋازىمداردا قىزمەت اتقاردى. وسى لاۋازىمعا تاعايىندالعانعا دەيىن پاۆلودار قالاسىنىڭ قۇرىلىس ءبولىمىنىڭ باسشىسى بولىپ قىزمەت ەتتى.

سونداي-اق، پاۆلودار وبلىسى جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسىنىڭ باسشىسى بولىپ ساعىن تولەۋتايەۆ تاعايىندالدى.

ساعىن سايران ۇلى 1988 -جىلى تۋعان، جوعارى ءبىلىمدى. 2010 -جىلى س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىن «ەكولوگيا» ماماندىعى بويىنشا اياقتاعان، جاراتىلىستانۋ عىلىمدارىنىڭ ماگيسترى دارەجەسى بار. 2012-2016 -جىلدارى س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ «بيولوگيا جانە ەكولوگيا» كافەدراسىندا وقىتۋشى بولدى.

مەملەكەتتىك قىزمەتتەگى ەڭبەك جولىن 2016 -جىلى پاۆلودار وبلىسى جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسىنىڭ جەر قويناۋىن پايدالانۋ ءبولىمىنىڭ باس مامانى بولىپ باستادى، ودان كەيىن 2019-2021 -جىلدارى وسى باسقارمانىڭ جەر قويناۋىن پايدالانۋ ءبولىمىنىڭ باسشىسى بولىپ ەڭبەك ەتتى. 2021 -جىلعى جەلتوقساننان باستاپ وسى ۋاقىتقا دەيىن «پاۆلودار وبلىسىنىڭ جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسى» م م باسشىسىنىڭ ورىنباسارى قىزمەتىن اتقاردى.

اۆتور

ايجان سەرىكجان قىزى