ەلىمىزدە العاش رەت «ءانشۋاق» بالالار اندەرى فەستيۆالى وتەدى
استانا. KAZINFORM - ەلىمىزدە العاش رەت حالىقارالىق بالالاردى قورعاۋ كۇنىنە ارنالعان «ءانشۋاق» بالالار اندەرىنىڭ فەستيۆالى وتەدى. بۇل تۋرالى وقۋ-اعارتۋ مينيسترلىگىنىڭ باسپا ءسوز قىزمەتى مالىمدەدى.
اتالعان ءىس-شارا - وسكەلەڭ ۇرپاقتىڭ مادەني ومىرىندەگى ەرەكشە وقيعا. ونىڭ باستى ماقساتى - حالقىمىزدىڭ ۇلتتىق ەرەكشەلىگى مەن رۋحاني مادەنيەتىن دارىپتەۋ.
فەستيۆال اياسىندا 1- اقپاننان باستاپ ەلىمىزدىڭ تۇكپىر-تۇكپىرىندە بالالار اندەرىنىڭ چەللەندجى باستالادى. وعان 6 جاستان 18 جاسقا دەيىنگى كەز كەلگەن بالا قاتىسا الادى. ول ءۇشىن TikTok الەۋمەتتىك جەلىسىندە #ءانشۋاق ورتاق حەشتەگىنىڭ استىنا بالالار ءانىنىڭ جاندى ورىندالعان بەينەسىن جۇكتەۋ قاجەت. قورىتىندىسى 1- ماۋسىمدا حالىقارالىق بالالاردى قورعاۋ كۇنىندە شىعارىلادى.
سونداي-اق، وسى كۇنى ەلىمىزدىڭ ءاربىر ەلدى مەكەنىندە Open Air فورماتىندا كونسەرتتەر وتەدى. ال ەلوردانىڭ وزىندە «ءانشۋاق» فەستيۆالىنىڭ گالا-كونسەرتى وتەدى.
«فەستيۆالدىڭ ەرەكشەلىگى - ەلىمىزدىڭ رۋحاني بايلىعىن پاش ەتەتىن، ەڭ باستىسى، وسكەلەڭ ۇرپاقتىڭ بويىندا «ءبىرتۇتاس تاربيە باعدارلاماسى» تۇجىرىمداماسىنا ەنگىزىلگەن ءداستۇرلى تاريحي، رۋحاني، مادەني قۇندىلىقتار نەگىزىندە تۇراقتى ادامگەرشىلىك قاسيەتتەردى دارىپتەۋگە باعىتتالعان. فەستيۆال ەلىمىزگە دەگەن ماقتانىش سەزىمىن وياتۋعا سەپتىگىن تيگىزەدى دەگەن سەنىمدەمىز»، - دەپ اتاپ ءوتتى تاربيە جۇمىسى جانە قوسىمشا ءبىلىم بەرۋ دەپارتامەنتىنىڭ ديرەكتورى مەرۋەرت مەدەتبەكوۆا.
ايتا كەتۋ كەرەك، ەڭ تانىمال اندەردى ورىنداۋشىلار ءوڭىر اكىمدەرىنىڭ رەسپۋبليكالىق گالا-كونسەرتىنە جولداما الادى. ال وعان قاتىسۋشىلار ديپلومدارمەن، باعالى سىيلىقتارمەن ماراپاتتالىپ، «بالداۋرەن» ر و و- عا جولداما الادى.
