ەلىمىزدە اۋە ەكيپاجدارىنا لازەرمەن شابۋىلداۋ جيىلەگەن
استانا. KAZINFORM - ەلىمىزدە اۋە كەمەسىن باسقارۋعا كەدەرگى جاساۋ ارەكەتتەرى ءۇشىن قىلمىستىق جاۋاپكەرشىلىك ەنگىزۋ ماسەلەسى قارالىپ جاتىر. بۇل تۋرالى ادىلەت مينيسترلىگى قوعامدىق ءتارتىپ سالاسىنداعى زاڭناما دەپارتامەنتىنىڭ ديرەكتورى دۋمان سۇلەيمەنوۆ ءمالىم ەتتى.
- قازاقستاندا اۋە ەكيپاجىن لازەرلىك قۇرىلعىلارمەن «سوقىر ەتۋ» وقيعالارى جيىلەگەن. ادەتتە بۇل ارەكەتتەر ۇشاق قونعان نەمەسە كوتەرىلگەن كەزدە بولىپ جاتادى. 2023-جىلى پيلوتتاردى لازەرلىك قۇرىلعىلارمەن «سوقىر ەتۋدىڭ» 60 دەرەگى تىركەلدى. ونىڭ ىشىندە 35 دەرەك بويىنشا تەرگەۋ ءجۇردى، ءبىراق 33 ءىس قۇرامىنىڭ بولماۋىنا بايلانىستى توقتاتىلدى جانە 2 ءىس قىلمىسكەر انىقتالماعاندىقتان جابىلدى. قالعان ماتەريالدار قۇزىرلى ورگاندارعا جىبەرىلدى نەمەسە ءىس داپتەرىنە تىركەلدى، - دەدى دۋمان سۇلەيمەنوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ادىلەت مينيسترلىگى وكىلىنىڭ مالىمدەۋىنشە، الماتى حالىقارالىق اۋەجايىندا 2017-جىلدان 2023-جىل ارالىعىندا 98 جاعداي تىركەلگەن.
- اۆستراليا، گەرمانيا، جاڭا زەلانديا، كانادا جانە ا ق ش- تا لازەرلىك شابۋىل قىلمىس بولىپ ەسەپتەلەدى. 2016-جىلى وزبەكستاندا قىلمىستىق كودەكستىڭ 263-1-بابىنا سايكەس اۋە كەمەسى ەكيپاجىنا لازەر ساۋلەسىمەن كەدەرگى جاساعانى ءۇشىن 1 جىلعا دەيىن باس بوستاندىعىنان ايىرۋ جازاسى ەنگىزىلدى. گەرمانيادا 315-باپ «تەمىرجول، سۋ نەمەسە اۋە كوممۋنيكاتسياعا قاۋىپتى كەدەرگى جاساۋ» اياسىندا 10 جىلعا دەيىن باس بوستاندىعىنان ايىرۋ جازاسى قاراستىرىلعان. حالىقارالىق ازاماتتىق اۆياتسيا ۇيىمى (ICAO) اۋە قوزعالىسىنىڭ قاۋىپسىزدىگىنە لازەر ساۋلەلەرىنىڭ تاۋەكەلىن تانىدى، - دەپ تولىقتىردى سپيكەر.
ايتا كەتسەك، ICAO قازاقستانعا ازاماتتىق اۆياتسيانى دامىتۋدىڭ باس جوسپارىن ازىرلەۋگە كومەكتەسەدى. بۇل تۋرالى حالىقارالىق ازاماتتىق اۆياتسيا ۇيىمى كەڭەسىنىڭ (ICAO) پرەزيدەنتى سالۆاتورە شاككيتانو Kazinform اگەنتتىگىنە بەرگەن سۇحباتىندا ءمالىم ەتتى.
